Ва Украіну з расейскага палону ў выніку абмену вярнуліся 130 палонных вайскоўцаў, паведамляе кіраўнік Офісу ўкраінскага прэзідэнта Андрэй Ермак.
Абмен адбываўся ў апошнія дні ў некалькі этапаў дзякуючы намаганням Каардынацыйнага штабу па пытаннях абыходжання з ваеннапалоннымі.
«Вялікі велікодны абмен палоннымі. Вяртаем 130 нашых чалавек. Ён праходзіў апошнія дні ў некалькі этапаў. Ваенныя, памежнікі, нацгвардзейцы, маракі, супрацоўнікі Дзяржаўнай спецыяльнай службы транспарту. Радавыя і сяржанты, якія траплялі ў палон на Бахмуцкім, Салядарскім, Запарожскім, Херсонскім кірунках», – напісаў Ермак.
У Каардынацыйным штабе па пытаннях абыходжання з ваеннапалоннымі ўдакладнілі, што на гэты раз удалося вярнуць:
- 92 вайскоўца Зброеных сіл Украіны;
- 20 тэраабаронцаў;
- 11 нацгвардзейцаў;
- 3 памежніка;
- 2 прадстаўніка Ваенна-марскіх сілаў;
- 2 работніка Дзяржаўнай спецыяльнай службы транспарту.
Пры гэтым 48 з гэтых людзей да гэтага часу лічыліся зніклымі без вестак. На жаль, частка вызваленых маюць раненні, у тым ліку шматлікія кантузіі і страчаныя канечнасці.
Алена Рувіна belsat.eu
