Казахстан не згодны з павышэннем тарыфу на прапампоўванне нафты па тэрыторыі Беларусі і збіраецца весці перамовы па гэтым пытанні, паведаміла Мінэнерга Казахстану «Інтэрфаксу».
«Казахстанскі бок не згодны з ідэяй павышэння тарыфу транспарціроўкі нафты (на 43 %) па тэрыторыі РБ і мяркуе неабходным правядзенне адпаведных перамоваў па гэтым пытанні з Міністэрствам эканомікі Рэспублікі Беларусь і канцэрнам “Белнафтахім”», – адзначае Мінэнерга Казахстану.
Гаворка ідзе пра транспартаванне 1,2 млн тон нафты за год праз «Дружбу» у Нямеччыну. Такім чынам казахстанская нафта павінна прайсці праз Расею, Беларусь і Польшчу.
Кошт транзіту праз Расею складае 1 127,766 расейскіх рубля за тону (блізу 39,2 беларускіх рублёў), а праз Беларусь – 455,94 рубля за тону (блізу 15,9 беларускіх рублёў).
Міністэрстве заявіла, што пры павелічэнні кошту тарыфу ў Беларусі на 43 % страты Казахстану складуць каля $2,64 млн.
Таксама «Гомельтранснафта Дружба» прапаноўвала расейскай «Транснафтце» павысіць кошт транспарціроўкі нафты ў напрамку Польшчы на 43 %, а ў напрамку Украіны – на 14,5 %.
Паводле звестак «Коммерсантъ», «Гомельтранснафта Дружба» скардзілася на «непрадбачаныя абставіны», праз якія транзітны грузаабарот скараціўся амаль у пяць разоў у параўнанні з 2022 годам. З-за вайны Расеі супраць Украіны Польшча і Германія адмовіліся прымаць расейскую нафту, таму па паўночнай галінцы «Дружбы» у Еўропу ідзе толькі нафта з Казахстану.
Арсен Рудэнка belsat.eu