На ўзбраенне рэактыўнай артылерыйскай брыгады Узброеных сілаў Беларусі паступіў найноўшы комплекс рэактыўнай сістэмы залпавага агню «Паланэз-М», паведамляе Міністэрства абароны Беларусі.
«У адпаведнасці з даручэннем кіраўніка дзяржавы чарговы ракетны комплекс В-300 «Паланэз-М» быў выраблены ў максімальна сціслыя тэрміны», – зазначылі ў Дзяржкамваенпраме.
«Паланэз-М» – удасканаленая версія «Паланэзу», які ўжо ёсць на ўзбраенні Беларусі. «Паланэз-М» дазваляе адной баявой машынай адначасова нанесці з высокай дакладнасцю ўдар па васьмі мэтах на дальнасці да 300 кіламетраў.
«Гэта могуць быць камандныя пункты, арсеналы з боепрыпасамі, скапленне тэхнікі і жывой сілы», – зазначае Міністэрства абароны.
Прыняцце на ўзбраенне «Паланэзу-М» Мінабароны называе адным з элементаў стратэгічнага стрымлівання.
У 2021 годзе старшыня Дзяржкамваенпраму Беларусі Дзмітрый Пантус заяўляў, што для «Паланэзу» была створаная ўласная ракета з дальнасцю да 300 кіламетраў.
Марыя Міхалевіч belsat.eu