Сусветны тыдзень прадпрымальніцтва Беларусі ў Варшаве («GEW Belarus 2022») прысвечаны новай бізнесовай рэальнасці. Упершыню за тры гады Тыдзень прадпрымальніцтва праходзіць у гібрыдным фармаце – офлайн і онлайн. Пра гэта паведаміла прадстаўніца «GEW Belarus», заснавальніца і галоўная выканаўчая дырэктарка «Imaguru Startup Hub» Таццяна Марыніч.
Сусветны тыдзень прадпрымальніцтва Беларусі трэці год запар праходзіць не ў Беларусі і ўпершыню ў праграме ёсць офлайн-выступленні ды імпрэзы, калі ўдзельнікі прадпрымальніцкага руху могуць сустракацца ўжывую. Як паведаміла ў сваім выступленні Таццяна Марыніч, гэты праект, які ёсць часткаю Сусветнага тыдня прадпрымальніцтва, працягвае падтрымліваць развіццё беларускага бізнесу.
Гісторыя «GEW Belarus» налічвае 12 гадоў, але, паводле Марыніч, апошнія тры гады беларускае прадпрымальніцтва перажывае адзін з самых няпростых перыядаў. Пераслед бізнесоўцаў, якія падтрымалі палітычныя пратэсты 2020 года, прывёў да таго, што мноства з іх аказаліся па-за межамі Беларусі. Шмат хто ўсцяж працуе ўнутры краіны, наўпрост перажываючы складаны для эканомікі ды грамадства час, ускладнены вайною ва Украіне і рэпутацыйнымі стратамі для беларусаў на сусветнай арэне. Гэта і стварае новую бізнес-рэальнасць для беларусаў. Цяпер беларускіх прадпрымальнікаў можна сустрэць у Польшчы, Літве, Грузіі, ЗША ды шмат якіх іншых краінах свету. Аднак, незалежна ад месца перабывання, яны не перастаюць «стасавацца і падтрымліваць адно аднаго, дзяліцца інсайтамі і дапамагаць адно аднаму ствараць новыя ды развіваць ранейшыя праекты».
«Сам-насам з праблемамі заставацца цяжка, таму сустрэчы Сусветнага тыдня прадпрымальніцтва Беларусі ў Варшаве задуманыя, каб прадпрымальнікі маглі падтрымліваць адно аднаго і натхняць працягваць справу ды пачынаць новыя праекты», – адзначыла Таццяна Марыніч.
Прадстаўніца «GEW Belarus» падкрэсліла, што ў праграме гэта форуму шмат гісторыяў поспеху беларусаў у новай рэальнасці, бо «прадпрымальнікаў нішто не можа спыніць у імкненні ствараць новы прадукт і развязваць праблемы іншых».
Таццяна Марыніч нагадала і пра тое, што трэба працягваць падтрымліваць тых удзельнікаў бізнес-супольнасці, якія аказаліся за кратамі ў Беларусі, праяўляць з імі салідарнасць, дапамагаць ім ды іхным сем’ям. Салідарнасць усёй беларускай бізнес-супольнасці, якая аказалася за межамі краіны, патрэбная і тым, хто не абмежаваны ў асабістай свабодзе, але свядома выбраў заставацца і працаваць у Беларусі. Адна з такіх формаў падтрымання – магчымасць абменьвацца новым досьведам, думкамі, ідэямі, бізнес-ведамі для беларускіх прадпрымальнікаў, дзе б яны ні былі. Усе выступленні падчас Сусветнага тыдня прадпрымальніцтва Беларусі ў Варшаве даступныя ў онлайн-фармаце, а потым іх можна паглядзець на YouTube-канале «IMAGURU Startup HUB». Усе імпрэзы форуму бясплатныя для наведнікаў.
Для шмат якіх беларускіх бізнесоўцаў, якія рэлакаваліся, «таксама ўсё няпроста»: страчаныя кліенты, сувязі, шматгадовыя напрацоўкі, разрыў сямейных, сяброўскіх і бізнес-сувязяў. Але Марыніч заклікала паглядзець на сітуацыю і пад іншым кутом: гэта час новых магчымасцяў і досведу, магчымасцяў працаваць на еўрапейскіх і міжнародных рынках, будаваць новыя бізнес-мадэлі, працуючы па ўсім свеце, а не толькі ў межах адной краіны, магчымасць інвеставаць і працягваць інвестыцыі, каб спрыяць уласнаму дабрабыту, развязваць праблемы людзей і рабіць унёсак у развіццё эканомікі, якая ўва ўсім свеце робіцца ўсё больш глабальнай і міжнароднай.
Як паведамілі «Белсату» арганізатары «GEW Belarus 2022», Сусветны тыдзень прадпрымальніцтва праходзіць адначасова ў ста краінах, але толькі Беларусі ды Украіне дазволілі праводзіць форум не на тэрыторыі сваё краіны. Сусветны тыдзень прадпрымальнікаў Беларусі ў Варшаве мае задачы не толькі падтрымаць беларускіх бізнесоўцаў па ўсім свеце, але і захаваць беларускіх прадпрымальнікаў часткаю міжнароднай прадпрымальніцкай супольнасці, захаваць і ўмацаваць міжнародную бізнес-інтэграцыю.
Неад’емнаю часткаю «GEW Belarus 2022» ёсць конкурс стартапаў «Startup Battle», які традыцыйна ладзяць усе 12 гадоў існавання форуму ў беларускім кантэксце. Удзельнікі маюць магчымасць прэзентаваць свае ідэі ды праекты перад міжнародным журы, у складзе якога – дзейсныя бізнесоўцы, ментары ды інвестары. Пераможцы конкурсу атрымаюць магчымасць прэзентаваць свае стартапы на асноўных сусветных стартап-пляцоўках.
«GEW Belarus 2022» праходзіць офлайн у «Google for Startups Campus Warszawa» і транслюецца онлайн.
Антон Тачняк belsat.eu