У Беларусі створаная апостальская адміністрацыя для грэка-каталікоў. Яе літургічнае адкрыццё ўзначаліў апостальскі нунцый арцыбіскуп Антэ Ёзыч, паведамляе Vatican News.
Апостальская адміністрацыя для грэка-каталікоў Беларусі была ўтвораная папам Францішкам 30 сакавіка 2023 года. Літургія з нагоды пачатку яе працы адбылася 15 ліпеня 2023 года ў царкве Душпастырскага цэнтру Праведнага Язэпа ў Менску.
Усталяванне апостальскай адміністрацыі звязанае з абмежаваннем наўпроставых кантактаў украінскіх і беларускіх грэка-каталікоў праз вайну ва Украіне. Раней грэка-каталіцкія святары з Беларусі праходзілі навучанне пераважна ва Украіне, украінскія біскупы пасвячалі святароў і дыяканаў для беларускіх грэка-каталіцкіх парафіяў.
Наяўнасць апостальскай адміністрацыі можа прадугледжваць усталяванне іерархіі і пасвячэнне ў біскупскі сан апостальскага адміністратара.
6 ліпеня Беларуская праваслаўная царква выдала камюніке, у якім патрабавала ад Ватыкану абмежаваць дзейнасць уніятаў у Беларусі.
Марыя Міхалевіч belsat.eu
