«Мы святкуем вашую перамогу ўва ўсім свеце». Еўрапейскія лідары віншуюць Украіну
Украіну з перамогаю ў «Еўрабачанні-2022» павіншавалі кіраўнікі краінаў Еўразвязу, а таксама беларуская лідарка Святлана Ціханоўская.
Прэм’ер-міністр Вялікай Брытаніі Борыс Джонсан напісаў:
«Гэта яскравае адлюстраванне не толькі вашага таленту, але і непахіснага падтрымання вашай барацьбы за свабоду».
Павіншаваў Украіну і міністр абароны Вялікай Брытаніі Бэн Ўоліс.
Прэзідэнтка Еўракамісіі Урзуля фон дэр Ляен зазначыла, што перамогу Украіны святкуе ўвесь свет:
«Сёння ўвечары вашая песня скарыла нашае сэрца. Мы святкуем вашую перамогу ўва ўсім свеце. ЕЗ з вамі».
«Няхай гэта будзе толькі адна перамога са шматлікіх у гэтым годзе. Любоў заўжды перамагае, праўда заўжды перамагае. З вамі Еўропа, з вамі нашыя сэрцы», – сказаў прэзідэнт Літвы Гітанас Наўседа.
Прэзідэнт Эстоніі Алар Карыс зазначыў, што еўрапейцы з нецярплівасцю чакаюць «Еўрабачання» ў наступным годзе ва Украіне.
Кіраўнік Еўрапейскай Рады Шарль Мішэль і вярхоўны прадстаўнік ЕЗ у замежных справах і палітыцы бяспекі Жузэп Бурэль таксама павіншавалі Украіну. Шарль Мішэль частку свайго допісу ў Twitter зрабіў па-ўкраінску.
Выказала свае віншаванні Святлана Ціханоўская.
«Выступленне Украіны сёння кранула маё сэрца: не толькі сама песня, але і тое, што нават падчас страшнай вайны ў сваёй краіне гэтыя людзі захоўваюць здольнасць да творчасці, паказваюць усяму свету не толькі сілу, але і прыгажосць сваёй нацыі. Я ўпэўненая, што ўвесь свет сёння – за Украіну, як і беларусы. Я віншую Украіну з гэтаю перамогай і веру ў тое, што далей на вашым шляху адбудзецца найважнейшая перамога, якой вам, дарагія ўкраінцы, таксама зычым усе мы», – сказала беларуская лідарка.
Прэзідэнт Украіны Уладзімір Зяленскі выказаў спадзяванне, што аднойчы «Еўрабачанне» пройдзе ў Марыупалі:
«Нашая мужнасць уражвае свет, нашая музыка скарае Еўропу! У наступным годзе Украіна будзе прымаць «Еўрабачанне»! Трэці раз у сваёй гісторыі. І я веру – не апошні. Мы зробім усё, каб аднойчы ўдзельнікаў і гасцей «Еўрабачання» прымаў украінскі Марыупаль. Вольны, мірны, адбудаваны! Дзякую за перамогу «Kalush Orchestra» і ўсім, хто аддаў за нас свае галасы! Упэўнены: не за гарамі наш пераможны акорд у бітве з ворагам».
Украінскі гурт «Kalush Orchestra» перамог у фінале «Еўрабачання-2022» з песняю «Стэфанія». Гэта трэцяя перамога Украіны на «Еўрабачанні»: у 2004 годзе першае месца здабыла спявачка Руслана, у 2016-м – Джамала.
Лідар «Kalush Orchestra» Алег Псюк пасля выступу са сцэны звярнуўся да свету з заклікам уратаваць абаронцаў Марыупалю з «Азоўсталі». Пасля абвяшчэння вынікаў спявак падзякаваў свету за падтрыманне і скончыў прамову словамі «Слава Украіне!».
Другое месца на конкурсе заняла Вялікая Брытанія, трэцяе – Іспанія.
Тым часам «Kalush Orchestra» прэзентаваў кліп на песню «Stefania». Яго здымалі ў Бучы, Ірпіні, Барадзянцы, Гастомэлі.
ГГ, belsat.eu
