Міністр унутраных справаў і кіраўніцтва Польшчы Мар’юш Каміньскі паведаміў пра затрыманне двух расейцаў, якія распаўсюджвалі «прапагандысцкія матэрыялы» ПВК Вагнэра. Іх абвінавацілі ў шпіянажы.
Налепкі з рэкламаю ПВК Вагнэра раней заўважылі ў Варшаве і Кракаве. Як паведаміў міністр унутраных справаў і адміністрацыі Польшчы Мар’юш Каміньскі, паліцыя разам з Агенцтвам нацыянальнай бяспекі знайшла і затрымала двух грамадзянаў Расеі, якія распаўсюджвалі «прапагандысцкія матэрыялы» баевікоў:
«Абодвум выстаўленыя абвінавачванні, у тым ліку ў шпіянажы. Іх узялі пад варту».
Міністр паабяцаў, што найбліжэйшым часам польскія ўлады абнародуюць падрабязнасці гэтай гісторыі.
На налепках, што з’явіліся ў Варшаве і Кракаве, маецца QR-код, які кіруе на расейскамоўны сайт групоўкі, а таксама заклік далучацца.
Сяргей Крот belsat.eu