Расейскі кіраўнік Уладзімір Пуцін у адказ на пытанне журналіста пра вагнэраўцаў і іхны далейшы лёс заявіў, што юрыдычнай асобы ПВК у Расеі няма, але ёсць група. Паводле Пуціна, гэта няпростае пытанне і павінна абмяркоўвацца ўладамі, паведамляе выданне «Коммерсантъ».
Журналіст выдання распытваў у Пуціна падрабязнасці ягонай сустрэчы з камандзірамі ПВК Вагнэра ў Крамлі 29 чэрвеня. Тады сустрэча доўжылася тры гадзіны.
На пытанне журналіста, ці захаваецца ПВК Вагнэра як баявая адзінка, Пуцін адказаў:
«Ну дык ПВК Вагнэра не існуе! У нас жа няма закону аб прыватных вайсковых арганізацыях! Проста не існуе! То бок калі няма закону, то няма і ПВК».
«А што ж гэта тады ўсё было?» – спытаў журналіст. На што Пуцін толькі адказаў: «Такой юрыдычнай асобы няма».
Таксама на просьбу распавесці, што насамрэч адбывалася падчас мяцяжу Прыгожына, расейскі прэзідэнт адказаў:
«А што адбывалася насамрэч? Усё вельмі проста і відавочна для расейскага грамадства. Шараговыя байцы Вагнэра ваявалі годна, так… Тое, што яны аказаліся ўцягнутыя ў гэтыя падзеі, выклікае шкадаванне… Я скажу так, вельмі акуратна».
Раней Пуцін заяўляў, што ПВК Вагнэра цалкам фінансавалася з дзяржбюджэту. За год на гэтыя мэты патрацілі больш за 86 млрд расейскіх рублёў (952 мільёны долараў). Паводле Пуціна, Прыгожын таксама зарабляў на продажы харчавання вайскоўцам.
Алена Рувіна belsat.eu