Спікер Крамля Дзмітрый Пяскоў зняпраўдзіў інфармацыю пра тое, што Расея і Украіна планавалі дамовіцца аб арэндзе Крыму, піша Telegram-канал «Вы слушали Маяк». Раней пра гэта заявіў Лукашэнка, распавядаючы пра расейска-ўкраінскія перамовы ў Беларусі напачатку вайны.
Прэс-сакратар прэзідэнта Расеі Уладзіміра Пуціна Дзмітрый Пяскоў адмаўляе, што Масква спрабавала дамовіцца з Кіевам аб арэндзе Крыму.
«Не, гэта не так. Крым – неад’емная частка Расеі, гэта расейскі рэгіён», – сказаў Пяскоў журналістам.
Раней Аляксандр Лукашэнка заявіў, што падчас расейска-ўкраінскіх перамоваў у Беларусі, што ладзілі на тэрыторыі Беларусі, дэлегацыі дамаўляліся аб арэндзе анексаванага Расеяй Крыму.
«Пуцін мне перадае дакумент, што быў парафіраваны дэлегацыямі. Нармалёвы, нават пра Крым – арэнда там нейкая працяглая, пра Данбас … І ўжо дамаўляліся, што МЗС парафіруюць і ў далейшым мусяць вызначыцца кіраўнікі дзяржаваў, падпісваюць і іншае. Добры быў працэс, але яны ад яго адмовіліся«, – сказаў палітык.
Ён таксама паскардзіўся, што тыя перамовы «на патрабаванне Захаду» перанеслі ў Стамбул.
Сяргей Крот belsat.eu