Капітан Генеральнага штабу Дзяніс Урад, які распавёў пра планы задзеяць армію для здушэння пратэстаў на Дзень Волі, пакараны 18 гадамі зняволення. Пра гэта паведамляе прэс-служба Генпракуратуры.
Справа разглядалася ў Вярхоўным Судзе, вырак вынес суддзя Аляксандр Лупіновіч.
29-гадовага спецсувязіста Генштабу Узброеных сілаў Беларусі абвінавацілі ў тым, што ён сфатаграфаваў сакрэтны ліст ад міністра ўнутраных справаў міністру абароны і «даслаў польскаму тэлеграм-каналу». У лісце кіраўнік МУС, насуперак Канстытуцыі, прасіў прыцягнуць войскі да разгону пратэстаў.
Суд разглядаў справу Урада ў закрытым рэжыме. Прысуд набыў моц з моманту абвяшчэння, і абскарджванню, апратэставанню ў апеляцыйным парадку ён не належыць.
Дзяніс Урад прызнаны палітвязнем. Паводле праваабаронцаў, пераслед Дзяніса Урада парушае абавязкі дзяржавы паводле арт. 19 Міжнароднага пакту аб грамадзянскіх і палітычных правах і кіраваны на дасягненне непрымальных у дэмакратычным грамадстве мэтаў.
ІІ belsat.eu
