Сустрэча прэзідэнта Расеі Уладзіміра Пуціна і Аляксандра Лукашэнкі адбудзецца да канца тыдня, заявіў прэс-сакратар расейскага кіраўніка Дзмітрый Пяскоў, паведамляе ТАСС. Па выніку перамоваў яны могуць зрабіць заяву.
Сустрэчу сёння таксама анансаваў Аляксандр Лукашэнка. Паводле яго слоў, на ёй плануецца вырашыць, «калі, у якія тэрміны, па якім графіку» будуць выводзіць Узброеныя сілы Расеі з Беларусі пасля беларуска-расейскіх вучэнняў, якія праходзяць на тэрыторыі Беларусі з 10 па 20 лютага. Пры гэтым Лукашэнка зазначыў, што расейскія войскі выведуць па рашэнні двух кіраўнікоў, калі вучэнні завершацца.
Аднак на пытанне, ці будзе абмяркоўвацца графік вываду расейскіх войскаў з Беларусі, Пяскоў сказаў:
«Не будзем забягаць наперад. Давайце дачакаемся сустрэчы. Спадзяемся, што два прэзідэнты таксама зробяць заявы па выніках іх перамоваў».
12 лютага адбылася тэлефонная размова Уладзіміра Пуціна з Аляксандрам Лукашэнкам. Паведамляецца, што падчас размовы былі разгледжаны пытанні далейшага развіцця двухбаковага супрацоўніцтва, а таксама сітуацыя вакол рэакцыі ЗША і НАТА на расейскія прапановы па выпрацоўцы доўгатэрміновых міжнародна-прававых гарантыяў бяспекі.
АД belsat.eu