Генеральная пракуратура Беларусі распачала крымінальную справу супраць Паўла Латушкі. Палітыка абвінавачваюць паводле ч.3 арт.426 КК («Учыненне злачынства супраць інтарэсаў службы»).
Пракуроры лічыць, што Павел Латушка ў 2012 годзе, калі займаў пасаду Міністра культуры, нібыта аддаваў загады падначаленым уключаць у тэматычны план вытворчасць фільмаў. У выніку Дэпартамент па кінематаграфіі заключыў з кінавытворцамі дамовы і незаконна прафінансаваў вытворчасць некаторых фільмаў.
«З карыслівай і іншай асабістай зацікаўленасці, дакладна ведаючы пра адсутнасць у адпаведнасці з заканадаўствам падставаў для фінансавання за кошт бюджэту Беларусі шэрагу заведама незапатрабаваных кінапраектаў, наўмысна аддаў указанне, якое выходзіць за межы яго правоў і паўнамоцтваў, прадстаўленых яму па службе, пра ўключэнне ў тэматычны план вытворчасць фільмаў на 2012-2013 гады», – паведамляе пракуратура.
Пракуратура не распавядае, пра якія фільмы вядзецца, але паведамляе, што дзейнасць Паўла Латушкі нібыта нанесла шкоду дзяржаўным і грамадскім інтарэсам. Усё гэта пракуроры называюць супрацьпраўнымі дзеяннямі і перавышэннем службовых паўнамоцтваў.
У кастрычніку сёлета супраць Святланы Ціханоўскай і Паўла Латушкі ў Беларусі распачалі крымінальную справу за самавольнае прысваенне звання ці ўлады службовай асобы.
Такім чынам у «калекцыі» Паўла Латушкі шэсць крымінальных артыкулаў. Палітыка вінавацяць у перавышэнні службовых паўнамоцтваў, стварэнні экстрэмісцкага фармавання, змове з мэтаю захопу дзяржаўнай улады неканстытуцыйным шляхам, заклік да звяржэння або змены канстытуцыйнага ладу ў Беларусі і злачынства супраць дзяржавы, інкрымінуюць таксама акт тэрарызму і самавольнае прысваенне звання і ўлады службовай асобы.
КІ belsat.eu
