«Белкамунмаш» выправіў у Расею сваіх адмыслоўцаў для разбору інцыдэнту з трамваем у Самары, перадае БелТА. Вагон загарэўся на маршруце 11 лістапада. Пасажыры паспелі эвакуявацца, ніхто не пацярпеў.
«Прадстаўнікі холдынгу аналізуюць інфармацыю, ладзяць разбор адносна прычынаў узгарання, каб прыняць адпаведныя захады дзеля забеспячэння бяспекі пасажырскіх перавозак і недапушчэння такіх выпадкаў у далейшым», – гаворыцца ў паведамленні «Белкамунмашу».
Вытворца таксама перапрасіў за тое, што адбылося.
Беларускі трамвай загарэўся 11 лістапада ў цэнтры Самары. Пасажыры своечасова выйшлі на вуліцу, ніхто не пацярпеў.
Гэты вагон паставілі некалькі месяцаў таму. У мясцовай кампаніі-перавозніку паведамілі, што хутчэй за ўсё здарылася кароткае замыканне, а парашковая сістэма пажаратушэння трамвая не дала рады. На прадпрыемстве таксама паскардзіліся, што «Белкамунмаш» пратэрмінаваў дамову, і з 12 вагонаў горад пакуль атрымаў толькі 5.
Пасля пажару праверку распачаў Следчы камітэт.
Гэта не першая праблема з беларускай тэхнікай, якую купляе Расея. Раней паведамлялася пра шэсць аўтобусаў МАЗу, што згарэлі ў Пецярбурзе. На нейкі час там цалкам спынялі эксплуатацыю беларускіх машын. Паводле версіі Лукашэнкі, пажары здараліся не праз нізкую якасць тэхнікі, а праз тое, што абслугоўванне ладзілі людзі, «якія ніколі не бачылі аўтобусаў».
СК belsat.eu