Палкоўніка са Следчага камітэту паставілі кіраваць кадрамі РНПЦ неўралогіі ў Менску
Намеснікам дырэктара Рэспубліканскага навукова-практычнага цэнтру (РНПЦ) неўралогіі і нейрахірургіі ў Менску прызначылі былога палкоўніка са Следчага камітэту Віталя Бялкоўскага, датычнага да рэпрэсіяў супраць беларускага народу. Гэта заўважылі «Белые халаты».
Раней палкоўнік Віталь Бялкоўскі займаў пасаду намесніка начальніка ўпраўлення Следчага камітэту (СК) па Менску. Пад ягоным кіраўніцтвам СК распачаў як мінімум 72 крымінальныя справы супраць беларусаў. У РНПЦ неўралогіі і нейрахірургіі ён працуе цяпер намеснікам дырэктара ў справах бяспекі, рэжыму і кадраў.
«Як так атрымалася, што ў мінулым сілавік, які не мае медычнай адукацыі, рэзка стаўся намеснікам дырэктара РНПЦ? Міністэрства здароўя, мы разумеем, што вам гэта цяжка ўявіць, але да працы ў шпіталях варта прыцягваць кваліфікаваных медыкаў, а не сілавікоў», – пішуць «Белые халаты».
Выданне «Наша ніва» дазналася, што палкоўнік Бялкоўскі меў дачыненне да завядзення крымінальных справаў супраць людзей, якія пасля смерці Аляксандра Тарайкоўскага ў жніўні 2020 года пісалі на месцы ягонага забойства словы «Не забудзем».
Гэты ж палкоўнік хлусіў потым, што ўдзельнікі мірных маршаў нанеслі вялікія страты Менску і «шкодзілі маёмасць».
Выданне даведалася, што Віталь Бялкоўскі ў 1996 годзе пачынаў працаваць следчым у Першамайскім РУУС Менску, пасля – начальнікам упраўлення арганізацыі расследавання злачынстваў і каардынацыі аператыўна-службовай дзейнасці УСК па Менску. Пазней – намеснікам начальніка ўпраўлення СК па Менску. Цяпер ён у спісе кіраўнікоў РНПЦ неўралогіі і хірургіі.
Зміцер Міраш belsat.eu
