12 кастрычніка ўлады Эстоніі выклікалі прадстаўніка Беларусі, каб выказаць рэзкае асуджэнне той дапамогі, якую рэжым Аляксандра Лукашэнкі аказвае Расеі ў вайне супраць Украіны. Пра гэта паведамляе Postimees.
Міністр замежных справаў Эстоніі Урмас Рэйнсалу заявіў, што беларускія ўлады маюць дачыненне да жорсткай вайны Расеі супраць Украіны.
«Расейскае войска выкарыстоўвае беларускія боепрыпасы, запчасткі і тэрыторыю для нанясення авіяўдараў па Украіне, што робіць Лукашэнку і беларускае кіраўніцтва ўдзельнікамі вайны», – дадаў ён.
Рэйнсалу падкрэсліў, што Эстонія будзе няўхільна падтрымліваць беларускія дэмакратычныя сілы, каб парушэнні правоў чалавека і міжнароднага права ў краіне не засталіся незаўважанымі. Паводле яго, міжнародная супольнасць павінна і надалей выступаць за безумоўнае і неадкладнае вызваленне ўсіх палітвязняў у Беларусі.
Міністр нагадаў, што Эстонія арганізавала са Святланай Ціханоўскай у Генасамблеі ААН некалькі дыскусій, у якіх прынялі ўдзел прадстаўнікі розных краін, аналітычных цэнтраў і кампаній.
«Мы плануем і далей рабіць усё магчымае, каб голас апазіцыі і беларусаў, якія цэняць дэмакратыю ў цэлым, дайшоў да грамадскасці», – падкрэсліў Рэйнсалу.
Таксама Эстонія хоча ўзмацніць супрацу з беларускімі дэмакратычнымі сіламі, асноўны цэнтр якіх засяроджаны ў Вільні.
«Мы плануем накіраваць у Вільню дыпламата з асаблівымі паўнамоцтвамі, які засяродзіцца на стасунках з дэмакратычнымі сіламі Беларусі, а ў хуткім часе мы прымем у Таліне лідарку беларускай апазіцыі Святлану Ціханоўскую», – дадаў кіраўнік МЗС.
Апроч таго, у адказ на рашэнне Беларусі аб скарачэнні колькасці супрацоўнікаў амбасады Эстоніі ў Менску Талін устанаўлівае ліміт складу беларускага прадстаўніцтва ў сябе, паводле якога ў Эстоніі могуць працягваць працаваць адзін беларускі дыпламат і адзін адміністрацыйна-тэхнічны працаўнік.
Нагадаем, што беларускае Міністэрства замежных справаў выклікала часовую павераную ў справах Эстоніі ў Беларусі Трыйн Хіесалу і запатрабавала з 1 кастрычніка зменшыць штат амбасады да дваіх асобаў. Гэта стала адказам на арганізаваны Талінам візіт Святланы Ціханоўскай у ААН.
Якуб Хруст belsat.eu