Што за карысць уладам ад новых крымінальных справаў супраць Ціханоўскай і Латушкі?
«Самавольнае прысваенне звання ці ўлады службовай асобы» – яшчэ адзін пункт у калекцыі абвінавачванняў супраць лідараў беларускага пратэсту Святланы Ціханоўскай і Паўла Латушкі. Але ж яны за мяжой, а паводле ранейшых абвінавачванняў іх не судзілі. Які сэнс ад новага артыкулу?
Паводле Следчага камітэту Беларусі, новую крымінальную справу распачалі за тое, што Святлана Ціханоўская і Павел Латушка «стварылі псеўдаорганы дзяржаўнай улады і ўпраўленняў і прадстаўніцтваў Рэспублікі Беларусь за мяжой і, працягваючы свае злачынныя дзеянні, уступілі ў перамовы з прадстаўнікамі замежных дзяржаваў і міжнародных арганізацыяў».
Колькі артыкулаў у калекцыі Ціханоўскай і Латушкі
Супраць і Святланы Ціханоўскай, і Паўла Латушкі ўжо распачыналі крымінальныя справы паводле чатырох крымінальных артыкулаў:
- ч.1 арт. 14 / ч.3 арт. 289 КК РБ – «Замах на акт тэрарызму»;
- ч.1 арт. 357 КК РБ – «Змова з мэтай захопу дзяржаўнай улады»;
- ч.3 арт. 361 КК РБ – «Заклікі да дзеянняў на шкоду нацыянальнай бяспецы»;
- ч.1 арт. 361-1 КК РБ – «Стварэнне экстрэмісцкага фармавання».
Яшчэ два артыкулы мае Ціханоўская, а Латушка не мае:
- ч.1 арт. 13 / ч. 1 арт. 292 КК РБ – «Падрыхтоўка да захопу будынкаў»;
- ч.1 арт. 13 / ч.2 арт. 293 КК РБ – «Падрыхтоўка да масавых беспарадкаў».
На дадатак, справу паводле артыкулу 361 распачалі супраць усёй Каардынацыйнай рады (аб стварэнні якой заяўляла Ціханоўская і ў прэзідыум якой увайшоў Латушка).
Што думаюць у офісе Ціханоўскай
Прэс-сакратарка офісу Святланы Ціханоўскай Ганна Красуліна расказала «Белсату», што юрысты офісу не бачаць практычнага сэнсу ад новай крымінальнай справы. Ад сябе яна дадае, чым лічыць новую крымінальную справу:
- Спробай стварыць навіну, але правальнай. Улады, кажа яна, паказваюць, што не могуць генераваць уласныя навіны, але хочуць дэманстраваць, нібыта ініцыятыва на іхным баку.
- Спробай «перакласці з хворай галавы на здаровую», інфантыльнай логікай: «Я вас першы абвінаваціў, а зараз вы не зможаце мне гэта выставіць».
- Спробай закамуфляваць уласную слабасць, «надзіманнем шчок пры ўласным бяссіллі».
- Але ў выніку – дэманстрацыяй уласнай бездапаможнасці, спробай «якаць», «выскокваць уверх» без падставы, «прэтэнзіяй на значнасць».
Красуліна пры тым адзначае, што навінаў пра развіццё краіны ва ўладаў няма, а «усе разумеюць», што самазванец – гэта Лукашэнка.
Што думае палітолаг
Палітолаг Валер Карбалевіч кажа «Белсату»: практычнай карысці не відаць, але гэта «логіка застрашвання, логіка пашырэння рэпрэсіяў, логіка існавання рэпрэсіўнай машыны ў недэмакратычным грамадстве».
«Бачыце, і на тых людзей, якія цяпер сядзяць за кратамі ў Беларусі, заводзяць новыя і новыя крымінальныя справы, – разважае Карбалевіч. – Здавалася б, асаблівага сэнсу ў гэтым няма, але так можна працягнуць пераслед, узмацніць пакаранні і гэтак далей».
Карбалевіч дапускае, што ёсць нейкія планы колькасці крымінальных справаў у праваахоўных органаў або Следчага камітэту – ён згадвае, як людзей затрымлівалі па другім-трэцім разе за тое самае злачынства. А раз публічных пратэстаў у Беларусі ўжо амаль няма, але ёсць устаноўка не змяншаць колькасць новых крымінальных справаў, знайшлі такое выйсце.
Тэарэтычна, улады Беларусі могуць выкрасці Ціханоўскую і Латушку з-за мяжы. Лукашэнка абяцаў, згадвае Карбалевіч, «дастаць» Валерыя Цапкалу за каментар пра забойства супрацоўніка КДБ у Менску (і за гэта таксама распачалі крымінальную справу). Але ці адважацца выкрадаць чалавека з іншай краіны?
«Я не бачу практычнага сэнсу ў гэтым: скандал будзе вялікі, санкцыі могуць узмацніць, а практычнага выніку не будзе, – разважае Карбалевіч. – Усё, што маглі, Латушка і Ціханоўская зрабілі, новых небяспекаў ад іх чакаць не выпадае. Нейкай яшчэ большай шкоды рэжыму, чым яны дасюль зрабілі, яны наўрад ці зробяць».
Што пішуць Telegram-каналы
Медыяэксперт Серж Харытонаў піша ў Telegram, што справы аб «прысваенні ўлады» гэта «фактычнае прызнанне палітычнай суб’ектнасці абодвух палітыкаў». Паводле яго, улады прызналі, што дэмакратычныя сілы сфармавалі асновы будучай дыпламатычнай службы; прызналі суб’ектнасць альтэрнатыўных інстытутаў, якія ўжо прызнаныя і беларусамі, і іншымі дзяржавамі, і міжнароднымі арганізацыямі; прызналі «дэзінтэграцыю» сістэмы вонкавапалітычных кантактаў.
Пра тое ж піша ананімны Telegram-канал «Нік і Майк»: заяўляе, што крымінальнай справай з гэткай фармулёўкай пра «прысваенне ўлады» афіцыйны Менск легітымізаваў тых, хто нібыта «нічога ніколі нідзе не выйграваў», а таксама прызнаў татальны правал у вонкавай палітыцы.
Блогер Антон Матолька заўважае: Следчы камітэт прызнае тое, што дэмакратычныя сілы працуюць і вядуць перамовы з міжнароднымі гульцамі, пакуль Лукашэнка «ездзіць на паклон да Пуціна ў Сочы».
«Nexta» кпіць: «Лукашэнка знайшоў на сябе артыкул у Крымінальным кодэксе», бо гэта ён прайграў выбары і прысабечыў уладу.
АА belsat.eu
