Амерыканская кампанія касмічных тэхналогіяў «Maxar Technologies» апублікавала спадарожнікавыя здымкі, як заяўляюць, беларускага аэрадрому каля вёскі Зябраўка Гомельскай вобласці. Там мясцовыя жыхары ў ноч на 11 жніўня чулі гукі выбухаў і бачылі выбліскі.
На фота 12 жніўня відаць сляды пажару на ўзлётна-пасадачнай паласе.
«На сённяшніх здымках на галоўнай узлётна-пасадачнай паласе можна ўбачыць сляды абпалу ад нядаўняга выбуху, а паблізу відаць спаленую расліннасць», – заявілі ў Twitter кампаніі.
Аналітык OSINT Олівэр Александэр у Twitter ідэнтыфікаваў згарэлы аб’ект як «танк Т-72 або падобны».
«Беларускаму Гаюну» вядома пра мінімум аднаго пацярпелага ў выніку выбухаў.
Беларускія тэлеграм-каналы паведамілі, што ў ноч на 11 жніўня ў раёне аэрадрому «Зябраўка» былі заўважныя выбухі і выбліскі. Таксама адчувалася ўдарная хваля.
У Міністэрстве абароны Беларусі заявілі, што «10 жніўня каля 23:00 падчас кантрольнага прабегу адной з адзінак тэхнікі пасля праведзенай замены рухавіка адбылося яе ўзгаранне». Пацярпелых няма.
Якуб Хруст belsat.eu