Belsat.eu падводзіць вынікі 13 жніўня – 370-га дня змагання беларусаў супраць скрадзеных прэзідэнцкіх выбараў і гвалту сілавікоў.
13 жніўня ў Осла Святлана Ціханоўская правяла сустрэчу з кіраўніком нарвежскай кампаніі «Yara» Свайнам Турэ Гулсэтэрам, прысвечаную сітуацыі з працаўнікамі «Беларуськалію», у якога «Yara» набывае калійныя ўгнаенні.
У выніку размовы Гулсэтэр заявіў, што «Yara» вырашыла перагледзець сітуацыю і да снежня прыняць рашэнне аб далейшай прысутнасці ў Беларусі.
Дмытро Кулэба, міністр замежных справаў Украіны, пацвердзіў намеры ўкраінскага ўраду пашырыць супрацу з найбольшым у Еўропе польскім нафтавым канцэрнам «ORLEN» дзеля дыверсіфікацыі паставак энергарэсурсаў і ўзмацнення энергетычнай бяспекі Украіны. Напачатку тыдня Лукашэнка пагражаў паставіць Украіну на калені ў нафтавым пытанні.
Расейскі цэнтр «Досье» супольна з нямецкім выданнем «Der Spiegel» пацвердзілі, што ўлады Беларусі сапраўды стаялі ля вытокаў мігранцкага крызісу і праз беларускую дзяржаўную кампанію дапамагалі мігрантам з Іраку трапіць у Літву і іншыя краіны Еўразвязу.
Паводле даследавання, адной з фірмаў, што каардынуюць паток нелегальных мігрантаў, стала дзяржаўная турыстычная кампанія «Цэнтркурорт», якая ўваходзіць у структуру Упраўлення справамі прэзідэнта Беларусі.
Між тым Памежная служба Літвы апублікавала відэа, на якім, як сцвярджаецца, у ноч з 12 на 13 жніўня пад літоўскім мястэчкам Дзевянішкі чалавек у вайсковай форме зайшоў за слуп, які пазначае мяжу Літвы і Беларусі – і адразу вярнуўся на беларускую тэрыторыю.
Дзяржпагранкамітэт абверг парушэнне беларускім памежнікам дзяржаўнай мяжы Літвы. Праўда, неяк вельмі няўпэўнена.
Жыхары Беларусі працягваюць забіраць з банкаў свае валютныя ўклады. Беларусы з пачатку года вывела з банкаў валютныя ўклады на $ 721,613 млн, або 12,34 %. Валютныя дэпазіты насельніцтва на 1 жніўня склалі $ 5,1281 млрд, скараціўшыся за ліпень на $ 131,5 млн, або на 2,5 %.
А кліенты беларускіх банкаў скардзяцца на праблемы з міжнароднымі плацяжамі – на іхныя рахункі не прыходзяць грошы з-за мяжы. Таксама паведамляецца і пра складанасці з разлікамі пластыкавымі карткамі замежных банкаў.
Эканамісты звязваюць гэта з магчымымі наступствамі санкцыяў.
Улады ж між тым працягваюць рэпрэсіі. Выносяць новыя прысуды, затрымліваюць праваабаронцаў і прызнаюць экстрэмісцкімі медыі.
Беларускія кібер-партызаны ж сцвярджаюць, што ўзламалі засакрэчаныя серверы МУС, дзе захоўваюцца запісы гутарак па ўнутранай сувязі ведамства. Паводле ўзломшчыкаў, запісы даюць «поўнае разуменне, якія ўстаноўкі спускала кіраўніцтва МУС зверху ўніз: калечыць і забіваць уласны народ».
МГ belsat.eu