Ужо даўно эксперты кажуць, што ў Расеі заканчваюцца запасы дакладнай зброі: напрыклад, што на гэта паказвае выкарыстанне супрацьпаветраных комплексаў С-300 для стральбы па наземных цэлях. Але ракеты пакуль не заканчваюцца .
Карэспандэнт «Белсату» высвятляў, колькі яшчэ засталося ракетаў у Расеі.
Другі дзень запар паветраная трывога гучыць па ўсёй Украіне. Пад абстрэлы 10 і 11 кастрычніка трапілі гарады далёка за лініяй фронту, удары прыйшліся на жылыя дамы, электрастанцыі, нават пешаходна-роварны мост у кіеўскім парку і дзіцячую пляцоўку ў цэнтры Кіева.
Паводле звестак Генеральнага штабу Збройных сілаў Украіны, 10 кастрычніка збілі 46 з 84 расейскіх крылатых ракетаў і 15 з 24 беспілотнікаў. Але ракеты забілі прынамсі 19 чалавек, паранілі 105 асобаў, пакінулі без электрычнасці сотні населеных пунктаў. 11 кастрычніка, паводле папярэдніх звестак, украінцы збілі 20 крылатых ракетаў з 28.
Расейскі вайсковы эксперт Павел Лузін казаў «The Insider» 10 кастрычніка, што гэтыя крылатыя ракеты Расея «назапашвала некалькі месяцаў», але старых савецкіх ракетаў для комплексаў C-300, «Точка-У» і «Ураган» хоць не так шмат, але «для тэрору хапае». Агулам, мяркуе ён, у Расеі вырабляецца не больш за 50 крылатых і аператыўна-тактычных балістычных ракетаў кожнага тыпу, агулам – каля 200 на год.
Вайсковы аглядальнік і былы прафесар расейскага МГІМО Юрый Фёдараў паведаміў «Белсату», што няма надзейнай інфармацыі пра тое, колькі ракетаў было выраблена за апошнія гады і колькі засталося ў спадчыну ад СССР. Былі толькі ацэнкі экспертаў на падставе ўскосных прыкметаў – гэтыя ацэнкі паказвалі, што ракетаў «Калібр» і «Іскандэр» засталося няшмат.
Фёдараў мяркуе, што ў Расеі няма магчымасці закупляць такія ракеты за мяжой – іх проста нідзе больш няма ў дастатковай колькасці. А магчымасці вытворчасці абмежаваныя праз тое, што для яе патрэбныя матэрыялы і камплектавальныя, якія вырабляюцца ў заходніх краінах або на Тайвані.
«З іншага боку, у Расеі ёсць, як я мяркую, вялікая колькасць, прынамсі сотні крылатых ракетаў паветранага базавання, вырабленых у савецкі перыяд і ў апошнія гады, якімі і наносіцца асноўная частка ўдараў па Украіне», – разважае Фёдараў.
Вайсковы эксперт украінскага Цэнтру даследаванняў арміі, канверсіі і раззбраення Ігар Леўчанка таксама кажа «Белсату», што ніхто дакладна не скажа, колькі ракетаў засталося ў Расеі, хоць ведаць гэта хацелі б усе. Але ён разважае: калі б у Расеі была дастатковая колькасць ракетаў для выканання пастаўленых задачаў, іх выкарыстоўвалі б.
На полі бою бачылі іранскія дроны, але іншай замежнай зброі ў расейскай арміі пакуль не бачылі, расказвае ён. Ці сапраўды былі нейкія пастаўкі з КНДР, невядома: на полі бою не бачылі. З Беларусі расейцы «выграбаюць усё начыста». Ёсць некаторыя іншыя краіны, дзе «расейцы могуць патроху пашчыпаць». Буйныя ж краіны, як Кітай, наўрад ці будуць прадаваць Расеі зброю: Леўчанка кажа, што для кітайскага кіраўніцтва гэта будзе непрымальна, бо Кітай намагаецца дыстанцавацца ад вайны.
Леўчанка адзначае, што ў апошнія месяцы расейскія войскі практычна не выкарыстоўвалі крылатых ракетаў сучаснага ўзору кшталту «Калібр» і Х-101 – «як мінімум, іх берагуць». Удары 10 кастрычніка былі масавымі, але паводле інтэнсіўнасці ўсё роўна «не дацягвалі» да першых тыдняў поўнамаштабнай вайны. І такіх масавых удараў не бачылі вельмі даўно.
Ён дапускае, што Расея праводзіць раскансервацыю больш старых ракетаў кшталту Х-55 (на базе якой ствараліся Х-555 і Х-101). Хіба не такія старыя, як Х-22, але больш сучасныя – прыводзяць у гатовы да бою стан і спрабуюць мадэрнізаваць. Ракеты тыпу C-300, якіх у Расеі можа быць шмат, выступаюць заменаю не крылатых ракетаў вялікай далёкасці тыпу «Калібр», а заменай аператыўна-тактычных комплексаў, як сучасны «Іскандэр» і савецкая «Точка-У».
І мадэрнізацыя старых ракетаў, і выраб новых, падобна, ідзе складана ва ўмовах санкцыяў, мяркуе Леўчанка. З эфектыўнасцю ўдараў цяпер праблемы, «высокадакладная сучасная зброя» губляе свае ўласцівасці:
«У гэтым плане вельмі паказальная ўчорашняя атака, калі, напрыклад, у Кіеве мы бачылі, што зброя, якая заяўляецца высокадакладнай, у якой адхіленне складае нібы не больш за 10 метраў, прамахвалася ад 100 метраў і да кіламетра», – расказвае Леўчанка.
Ён прыводзіць у прыклад траплянне ракеты ў парк Шаўчэнкі ў цэнтры Кіева. Магчыма, цэліліся ў карпусы кампаніі «Укртелеком», каб пашкодзіць забеспячэнне інтэрнэтам, але прамахнуліся на пару сотняў метраў. Магчыма, цэліліся ў галоўны будынак Службы бяспекі Украіны, які наогул стаіць за пару кварталаў адтуль, амаль за кіламетр. Іншы прыклад – учорашні ўдар па кіеўскай ЦЭЦ: было дзве ракеты, адна трапіла ў зямлю за некалькі сотняў метраў ад галоўнага будынку, другая ўпала не менш як за кіламетр ад галоўнага будынку.
Да таго ж выкарыстанне крылатых ракетаў у меншай колькасці вядзе да эфектыўнейшага іх перахоплівання: 10 кастрычніка перахапілі каля паловы ракетаў з больш як 80, а 11 кастрычніка, як папярэдне выглядае, перахапілі амаль тры чвэрці з прыблізна трох дзясяткаў. Леўчанка лічыць, што і ў Расеі разумеюць, што гарантыяй поспеху ўдару ёсць пераадоленне ўкраінскай супрацьпаветранай абароны, а гэта дасягаецца ў асноўным масавымі запускамі за кароткі час.
Алесь Наваборскі belsat.eu