Два гады для палітвязня і берасцейскі «Барадач» у ІЧУ. Хроніка рэпрэсіяў за 12 лютага
50-гадовага палітзняволенага Аляксея Кірэева пасадзілі на два гады за ўдзел у некалькіх акцыях пратэсту. Мужчыну судзілі паводле «народнага» артыкулу. Пра гэта – у чарговай хроніцы рэпрэсіяў, якую вядзе «Белсат».
Суддзя суда Савецкага раёну Менску Аляксандр Воўк агучыў вырак палітзняволенаму Аляксею Кірэеву: 2 гады калоніі. Мужчыну абвінавацілі паводле «народнага артыкулу» аб актыўным удзеле ў дзеяннях, што груба парушаюць грамадскі парадак. Праваабарончы цэнтр «Вясна» паведамляе, што Кірэеў у 2020 годзе ўдзельнічаў у некалькіх акцыях пратэсту, яго каля дзесяці разоў затрымлівалі ад пачатку выбарчай кампаніі, тройчы каралі арыштам на тэрмін ад 5 да 15 содняў.
У Берасці ў ізалятар часовага ўтрымання пасадзілі звольненага з мясцовага аўтапарку кіроўцу Міхаіла Сідарэнку, вядомага як «Барадач». Ён страціў працу пасля таго, як пачаў распавядаць пра праблемы на прадпрыемстве. Мужчыну затрымалі ў пятніцу, калі ў раённым судзе пачаўся разгляд ягонага іску аб узнаўленні на працы ў аўтапарку. Сідарэнка мусіць вызваліцца ў панядзелак. Паводле якога артыкулу яго затрымалі на трое содняў, пакуль не вядома.
Палітвязня Яўгена Рубашку, які адбывае пяцігадовы тэрмін у бабруйскай калоніі, на месяц перавялі ў памяшканне камернага тыпу. Перад гэтым яго тройчы змяшчалі ў штрафны ізалятар агулам на 24 дні паводле надуманых прычынаў, піша «АЧК-Беларусь». Рубашку судзілі летась разам з трыма іншымі анархістамі.
Прызначаная дата апеляцыі на прысуд «рэйкаваму партызану» Віталю Мельніку: 3 сакавіка. Пра гэта палітвязень паведаміў у вестачцы на волю, даведалася «Вясна». Мельніка асудзілі на 13 гадоў калоніі. Пры затрыманні сілавікі прастрэлілі яму калені. Ён дагэтуль перасоўваецца на мыліцах.
Сяргей Крот belsat.eu
