Цела пажылога беларуса ратаўнікі знайшлі каля выспы Карчэлі на паўночна-ўсходнім узбярэжжы Сардыніі. Мужчына ў лодцы разбіўся аб прыбярэжныя скалы, паведамляе італьянскае выданне «L’Unione Sarda».
Як піша выданне, трагедыя здарылася 4 лістапада. Мужчына званіў у берагавую ахову і адчайна прасіў паратунку. На пошукі лодкі з беларусам былі накіраваныя верталёты. Адначасова ратаўнікі спрабавалі зноў звязацца з мужчынам па тэлефоне, але сувязь была ўжо згубленая.
Паводле адной з версіяў, прычынай трагедыі магло быць рэзкае пагаршэнне ўмоваў надворʼя.
Рэшткі лодкі ратаўнікі знайшлі толькі на наступны дзень каля выспы Карчэлі. Цела з мора дасталі вадалазы. Італьянская пракуратура займаецца расследаваннем здарэння.
Прозвішча загінулага не паведамляецца.
Зміцер Міраш belsat.eu
