Журналіста і краязнаўцу Ігара Хмару затрымалі ўвечары 2 жніўня. Сукамернік пасля расказаў праваабаронцам, што Хмару затрымалі за размову на беларускай мове на вуліцы. Але судзілі яго паводле артыкулу за пратэсты. Праваабарончы цэнтр «Вясна» піша, што Хмару асудзілі 11 кастрычніка на два з паловай года «хатняй хіміі».
Суддзя Таццяна Пірожнікава ў судзе Маскоўскага раёну Менску 11 кастрычніка прызнала Ігара Хмару вінаватым і паводле арт. 342 КК РБ («Актыўны ўдзел у дзеяннях, якія груба парушаюць грамадскі парадак») асудзіла на два з паловай гады абмежавання волі без накіравання ў папраўчую ўстанову. Хмару вызвалілі ў зале суда.
Больш за тры месяцы Хмара правёў у няволі – яго па затрыманні змясцілі ў СІЗА № 1 на вуліцы Валадарскага ў Менску. Праваабаронцы прызналі яго палітычным зняволеным.
Алесь Наваборскі belsat.eu
