МУС паведамляе, што вучэнні міліцыянтаў у Гомельскай вобласці абумоўленыя «ўскладненнем вайскова-палітычнага становішча». Сілавікі бачаць пагрозу ў плане «ByPol» «Перамога».
Міністэрства ўнутраных справаў Беларусі канкрэтызавала сітуацыю з вучэннямі ў Ельску Гомельскай вобласці. На працягу некалькіх дзён міліцыянты разам з вайскоўцамі і мясцовымі ўладамі ладзяць тактычна-спецыяльныя вучэнні для пошуку і знішчэння магчымых дыверсійна-разведвальных групаў і незаконных узброеных фармаванняў.
«Сітуацыю яшчэ больш абвастраюць дэструктыўна настроеныя асобы, якія цяпер за межамі краіны. Яны заклікаюць да падрыўной дзейнасці ў адносінах да нашай дзяржавы, ажно да ўчынення актаў тэрарызму. У тым ліку ў межах так званага плану «Перамога» акцэнтуецца ўвага на падрыхтоўцы ўзброеных фармаванняў, задачы якіх звязаныя з наўпроставай пагрозай нацыянальнай бяспецы», – гаворыцца ў паведамленні МУС.
Міліцыянты не толькі вучацца адпрацоўваць ахоўныя захады, але і бяруць удзел у «контртэрарыстычнай аперацыі».
Алена Аляксандрава belsat.eu