Забойства кандыдата ў прэзідэнту Эквадору, лясныя пажары на Гаваях. Галоўныя здымкі тыдня

Беларусы Вільні прайшліся маршам ад Катэдральнай плошчы да амбасады Беларусі ў Літве. У трэцюю гадавіну прэзідэнцкіх выбараў у Беларусі ў дзясятках гарадоў за мяжой прайшлі акцыі салідарнасці. Па дадзеным праваабаронцаў на 11 жніўня 2023 года, у Беларусі 1487 палітычных зняволеных. Вільня, Літва.

Славенія сутыкнулася з найбуйнейшым у гісторыі краіны стыхійным бедствам, якое закранула 2/3 тэрыторыі. Праліўныя дажджы і выкліканыя імі паводкі забралі жыцці сама меней 6 чалавек. ЕЗ абяцае даць фінансавую падтрымку Славеніі для барацьбы з наступствамі разбуральных паводкаў. Прэвале (Prevalje), Славенія.

На гарналыжным курорце Саклыкент (Saklikent) у Антальі пачынаецца Нацыянальны фестываль назірання за небам «Погляд на Млечны Шлях». Гэта мерапрыемства штогод арганізуе Савет па навуковых і тэхналагічных даследаваннях Турцыі (Tubitak) для прафесійных астраномаў і астраномаў-аматараў. Анталья, Турцыя.

У выніку расейскага ракетнага абстрэлу Запарожскай вобласці пацярпела царква ў Запарожжы. На месцы трагедыі загінулі сама меней 3 чалавекі. Запарожжа, Украіна.

Украінка сядзіць ля пацярпелага ад абстрэлу будынку ў Пакроўску Данецкай вобласці. У выніку начной расейскай атакі загінулі 7 чалавек і яшчэ 88 пацярпелі. Пакроўск, Украіна.

Супрацоўнікі Міністэрства аховы навакольнага асяроддзя і лясной гаспадаркі Інданезіі знішчаюць канфіскаваныя прадметы гандлю дзікімі жывёламі, якія знаходзяцца пад пагрозай знікнення, у гонар Нацыянальнага дня аховы прыроды краіны. Мэдан, Інданезія.

Украінскія вайскоўцы практыкуюцца выкарыстоўваць турнікет пасля ранення падчас вучэнняў у Данецкай вобласці, Украіна.

Згарэлыя датла дамы і гавань у выніку лясных пажараў бачныя ў курортным мястэчку Лахайне на захадзе востраву Маўі. Прынамсі 53 чалавекі загінулі на ахопленым пажарам востраве, які ўваходзіць у склад Гавайскага архіпелага. Пажары выкліканы наймацнейшай спякотай і засухай, а хуткаму распаўсюджванню агню паспрыяў моцны вецер ад урагану «Дора», які бушуе над Ціхім акіянам за сотні кіламетраў на поўдзень ад выспаў. Фота Patrick T. Fallon / AFP / East News

Затрыманы падазраваны ў забойстве кандыдата ў прэзідэнты Эквадору Фэрнанда Віллявісэнсьё, якога застрэлілі пасля сустрэчы з выбаршчыкамі ў горадзе Кіта. Спадар Віллявісэнсьё акцэнтаваў увагу ў сваёй праграме на барацьбе з карупцыяй ды арганізаванай злачыннасцю ў краіне. 59-гадовы журналіст і палітык быў адным з васьмі кандыдатаў на пост прэзідэнта краіны на датэрміновых выбарах 20 жніўня. Як паведамілі СМІ, на месцы забойства былі затрыманы грамадзяне Калумбіі, магчыма, падасланыя наркакартэлем. Кіта, Эквадор.

Мігрантаў афрыканскага паходжання, якія спрабавалі морам патрапіць у Італію, перахапіла берагавая ахова Тунісу. 16 ліпеня Еўрапейскі звяз і Туніс заключылі пагадненне для стрымлівання нелегальнай міграцыі праз Міжземнае мора ў краіны ЕЗ, якая значна павялічылася ў апошнія тыдні. Тунісу вылучылі 100 млн еўра для пошуку лодак у мора, адпраўцы іх на радзіму і ўзмацненню берагавой аховы краіны, каб пазбегнуць няшчасных выпадкаў у моры.

Японцы запускаюць плывучыя ліхтары з пасланнем міру ў Мемарыяльным парку міру ў Хірасіме, каб аддаць даніну памяці ахвярам атамнага бамбавання 1945 года. Падчас Другой сусветнай вайны 6 жніўня 1945 года ЗША скінулі першую ў сусветнай гісторыі атамную бомбу на Хірасіму, а 9 жніўня на Нагасакі, што прывяло да імгненнай гібелі прыкладна 70 000 чалавек і яшчэ тысяч ад уздзеяння радыяцыі ў наступныя гады. Хірасіма, Японія.