Беларуская чыгунка плануе звольніць 8 тысячаў працаўнікоў. Мінтранс зняпраўджвае інфармацыю
Беларуская чыгунка (БЧ) збіраецца звольніць як мінімум 8 тысячаў чалавек. Такі план спусцілі чыгуначным функцыянерам зверху, і яго рэалізацыя пачнецца бліжэйшым часам, паведамляе супольнасць беларускіх чыгуначнікаў, спасылаючыся на свае крыніцы, вартыя даверу.
Неабходнасць звальнення вялікай колькасці працаўнікоў «Live. Сообщество железнодорожников Беларуси» тлумачыць цяжкім фінансавым станам на БЧ праз дзеянні санкцыяў, уведзеных у дачыненні Беларусі. Чыгуначнікі зазначаюць, што скарачэнне транзіту грузаў у бок ЕЗ, а таксама закрыццё для грузавых цягнікоў памежнага чыгуначнага пункту пропуску «Беняконі – Стасілы», а ў перспектыве і магчымае спыненне руху праз пункт пропуску «Гудагай – Кяна» не спрыяюць павелічэнню транзітнай прывабнасці Беларускай чыгункі.
«Ва ўмовах рэзкага зніжэння транзіту з перспектывамі яго амаль поўнай страты першае, на што здольнае кіраўніцтва БЧ, – выкінуць людзей на вуліцу. Бо, як вядома, транзіт ёсць асноўным артыкулам даходу гэтага прадпрыемства, менавіта дзякуючы транзіту ўсе папярэднія (да 2022 года) гады ўдавалася «зводзіць канцы з канцамі», – зазначае супольнасць беларускіх чыгуначнікаў.
У супольнасці мяркуюць, што звольніць могуць нават большую колькасць працаўнікоў БЧ, чымся меркаваныя 8 тысячаў. Звальняць могуць не толькі тых, хто быў заўважаны на пратэстах у 2020 годзе, але за любую правіну. І таму трэба быць пільнымі і не даваць нагодаў на такія захады «апрычнікаў» Беларускай чыгункі, папярэджваюць актывісты «Live. Сообщество железнодорожников Беларуси».
У Міністэрстве транспарту Беларусі зняпраўдзілі інфармацыю пра звальненне 8 тысяч чыгуначнікаў і назвалі яе «інфармацыйным укідам»: «Гэтыя «інфармацыйныя ўкіды» не адпавядаюць рэчаіснасці».
Зміцер Міраш belsat.eu
