Супраць удзелу расейскіх і беларускіх спартоўцаў у Алімпійскіх гульнях-2024 у Парыжы выступіла група з 35 краінаў, уключаючы ЗША, Нямеччыну, Францыю, Вялікаю Брытанію і Японію. Такое рашэнне было прынятае падчас віртуальнага саміту міністраў спорту краін у пятніцу, 10 лютага, піша Reuters.
«Мы ідзем у тым напрамку, што нам не патрэбны байкот, таму што ўсе краіны аднадушныя», – паведаміла міністр адукацыі, навукі і спорту Літвы Юргіта Шюгджынене.
Прэзідэнт Украіны Уладзімір Зяленскі, які таксама ўдзельнічаў у сустрэчы, заявіў, што «калі ёсць алімпійскі від спорту з забойствамі і ракетнымі ўдарамі, то вы ведаеце, якая нацыянальная каманда зойме першае месца». Ён таксама заявіў, што ў выніку ўварвання Расеі ва Украіне загінулі 228 спартсменаў і трэнераў.
«Пакуль Расея забівае і тэрарызуе, прадстаўнікам дзяржавы-тэрарыста не месца на спартовых і алімпійскіх спаборніцтвах. І гэта не перакрыеш якой-небудзь ілжывай нейтральнасцю ці белым сцягам. Таму што Расея цяпер такая, што ўсё запляміць крывёю, нават белы сцяг», – сказаў Зяленскі.
Раней Украіна прыгразіла байкатаваць гульні, калі расейскія і беларускія спартоўцы возьмуць у іх удзел.
Міністр спорту Вялікай Брытаніі Люсі Фрэйзер паведаміла ў Twitter, што сустрэча была вельмі прадуктыўнай. «Я вельмі выразна выклала пазіцыю Вялікай Брытаніі: пакуль Пуцін працягвае сваю варварскую вайну, Расея і Беларусь не павінны быць прадстаўлены на Алімпіядзе», – напісала яна.
Тым часам міністр спорту Польшчы Каміль Бартнічук прапанаваў стварыць для беларусаў і расейцаў зборную спартоўцаў-бежанцаў.
Раней МАК разглядаў пытанне пра допуск расейскіх і беларускіх спартсменаў выступіць на Алімпіядзе ў якасці нейтральных спартсменаў.
Алена Рувіна belsat.eu