У менскай міліцыі зноў прыгразілі праціўнікам дзейнай улады, якія б хацелі пратэставаць падчас Усебеларускага народнага сходу.
Прадстаўнік ГУУС Менскага гарвыканкаму Аляксандр Купчэня ў інтэрв’ю СТВ заявіў, што сілавікі маюць права ўжываць спецсродкі і зброю.
«Міліцыя будзе дзеяць згодна з Законам аб органах унутраных справаў. Нам закон дае права ўжываць фізічную сілу, спецыяльныя сродкі і зброю ў мэтах, прадугледжаных гэтым законам», – заявіў ён.
Паводле Купчэні, з 10 лютага міліцыя пераведзеная на ўзмоцнены варыянт нясення службы. Пад 24-гадзінную ахову ўзятыя ўсе аб’екты пражывання і наведання дэлегатаў, усе іхныя маршруты:
«У цэнтральнай частцы гораду з сёння нясуць службу працаўнікі патрульна-паставой службы міліцыі ў складзе парных пешых патрулёў для аховы грамадскага парадку. Акрамя таго, створаны і ўжо пачаў сваю працу Менскі гарадскі аператыўна-сітуацыйны штаб, які адсочвае становішча, апрацоўвае ды аналізуе ўсю інфармацыю, якая ўжо маецца, якая паступае і будзе паступаць».
Усё гэта адбываецца, не зважаючы на тое, што, паводле прадстаўніка міліцыі, пратэстоўцаў меншасць ды ім «пара супакоіцца» і думаць, «як карміць сямʼю».
Пра рыхтаванне міліцыі да УНС сведчыць і тое, што з 7:30 грамадскі транспарт не спыняецца на прыпынку «Станцыя метро «Кастрычніцкая», а на перасячэнні Лабанка і Сухараўскай – корак.
Таксама ў цэнтры гораду стаяць аўтазакі і міліцэйскія бусы.
МГ, belsat.eu