Галоўны рэдактар расейскай «Новой газеты» Дзмітрый Муратаў 10 снежня на ўручэнні Нобэлеўскай прэміі міру заявіў, што «гэтая прэмія – усёй прафесійнай супольнасці сапраўдных журналістаў».
«Свет разлюбіў дэмакратыю. Свет расчараваўся ў кіроўных элітах. Свет пацягнуўся да дыктатуры. Узнікла ілюзія, што прагрэсу можна дасягнуць тэхналогіямі і гвалтам, а не захаваннем правоў і свабодаў чалавека. Такі вось прагрэс без свабоды. Такое малако без каровы», – заявіў ён.
Паводле яго, у Расеі «ўлада актыўна прадае ідэю вайны», а «пад уплывам агрэсіўнага маркетынгу вайны людзі прывыкаюць да думкі аб яе дапушчальнасці».
«Але я ведаю – войны сканчаюцца з апазнаннем салдат і абменам палоннымі», – падкрэсліў Муратаў.
Расейскі журналіст таксама згадаў, што «ў цэнтры Еўропы да падзей на ўсходзе Украіны дадалася на мяжы вялікай крыві гульня Аляксандра Лукашэнкі».
«Яго вайскоўцы гоняць пад аўтаматамі бежанцаў з Блізкага Усходу на ланцугу аўтаматчыкаў, якія ахоўваюць межы Еўразвяза. Бакі абвінавачваюць адзін аднаго, а ашалелыя людзі кідаюцца літаральна паміж двума агнёў», – заявіў Муратаў.
Паводле яго, менавіта беларускія ўлады арганізавалі дастаўку ў Менск мігрантаў з Блізкага Усходу.
«Так і арганізуюцца ўзброеныя правакацыі і канфлікты. Мы, журналісты, высветліўшы, як гэта зроблена, зрабілі сваю працу. Далей – справа палітыкаў», – адзначыў галоўны рэдактар «Новой газеты».
Дзмітрый Муратаў падкрэсліў, што ў Расеі ўсё часцей ужываюць катаванні да зняволеных і затрыманых, у тым ліку да палітвязняў.
«Людзей катуюць, каб зламаць, каб павялічыць жорсткасць пакарання за рамкамі прысуду. Гэта дзікасць», – заявіў ён.
З гэтай нагоды нобэлеўскі лаўрэат выступіў з ініцыятывай стварэння Міжнароднага трыбуналу супраць катаванняў, «задача якога – збіраць звесткі пра ўжыванне катаванняў у розных частках свету і дзяржавах».
«Выявіць катаў і іх гаспадароў, якія маюць дачыненне да падобных злачынстваў», – падкрэсліў ён, дадаўшы, што «катаванні павінны быць прызнаныя найцяжэйшым злачынствам супраць гуманнасці».
Напрыканцы Муратаў заклікаў устаць і ўшанаваць хвілінай маўчання рэпарцёраў, якія аддалі жыцці за гэтую прафесію, і падтрымаць тых, хто падвяргаецца пераследам.
«Я хачу, каб журналісты паміралі старымі», – заявіў нобэлеўскі лаўрэат.
Нагадаем, што Нобэлеўскі камітэт 8 кастрычніка абвясціў лаўрэатаў прэміі міру. Імі сталі філіпіна-амерыканская журналістка Марыя Рэса і расейскі журналіст, адзін з заснавальнікаў незалежнай «Новай газеты» Дзмітрый Муратаў.
Нобэлеўскі камітэт прыняў рашэнне аб прысуджэнні прэміі міру з фармулёўкай «за высілкі па абароне свабоды выказвання меркаванняў, якая з’яўляецца перадумовай дэмакратыі і трывалага міру».
МГ belsat.eu