Аб’яднаны пераходны кабінет Беларусі, згодна з прынятаю Пастановаю № 2 ад 22 верасня, паведамляе, што прадстаўнікі Кабінету выканалі пастаўленыя перад імі задачы.
У перыяд з 22 верасня да 5 кастрычніка прадстаўнікі АПК зрабілі наступнае.
Прадстаўнік у справе законнасці і правапарадку Аляксандр Азараў праінфармаваў Кабінет пра ступень гатовасці мабілізацыйнага плану «Перамога» і вызначэнне яго галоўных прадпісанняў для ўдзельнікаў. Кабінет пастанавіў узмоцнена інфармаваць насельніцтва Беларусі пра асноўныя палажэнні плану «Перамога» і ролю грамадзянаў у ім.
Прадстаўнік у справе абароны і нацыянальнай бяспекі Валерый Сахашчык прапанаваў захады для наладжвання сталага ўзаемадзеяння Кабінету са згуртаваннямі беларускіх добраахвотнікаў, якія ваююць на баку Украіны, і надання ім рознабаковай дапамогі. Дакумент з прапанаванымі захадамі прызначаны для службовага карыстання і не падлягае распаўсюду ў поўным аб’ёме.
Прадстаўнік у справе транзіту ўлады Павел Латушка распавёў пра вынікі працы з беларускімі дзяржаўнымі службоўцамі, якія выявілі гатовасць падтрымаць дэмакратычныя змены, і прапанаваў да разгляду канцэпцыю «Кадравы рэзерв Новай Беларусі». Яна прадугледжвае адбор і навучанне работнікаў дзяржаўнага апарату для пераходнага перыяду. Таксама былі прапанаваныя варыянты палажэння, якое рэгламентуе прыняцце на службу, прысваенне воінскіх, спецыяльных званняў і класавых чыноў.
Прадстаўнік у замежных справах Валер Кавалеўскі прапанаваў захады да новай мабілізацыі міжнароднай дапамогі для дзейнасці Пераходнага кабінету і беларускай грамадскасці ў справе абароны незалежнасці і суверэнітэту Беларусі. Былі вызначаныя прыярытэтныя напрамкі міжнароднай супрацы Беларусі: умацаванне стасункаў з Украінаю, здабыццё падтрымання дэмакратычных краінаў і міжнародных арганізацыяў на пераходны перыяд.
Таксама Валер Кавалеўскі прэзентаваў Кабінету канцэпцыю перагляду дамоўна-прававой базы дачыненняў Беларусі з Расеяй, што прадугледжвае скасаванне дамоваў, што шкодзяць нацыянальнаму суверэнітэту і незалежнасці Беларусі. Найперш плануецца, што ў лік такіх увойдуць дамовы аб стварэнні Саюзнай дзяржавы, аб уваходжанні ў АДКБ і аб вайсковай супрацы з Расеяй, што зробіцца першым этапам скасавання расейскай вайсковай прысутнасці на тэрыторыі Беларусі.
Лідарка дэмакратычных сілаў Беларусі Святлана Ціханоўская абвесціла пра стварэнне Аб’яднанага пераходнага кабінету падчас канферэнцыі «Новая Беларусь» 9–10 жніўня 2022 года ў Вільні. Першыя асноўныя кандыдатуры яна прызначыла тэрмінам на 6 месяцаў. Гэта прадстаўнік у справе транзіту ўлады Павел Латушка, прадстаўнік у спрапве аднаўлення правапарадку Аляксандр Азараў, прадстаўнік у замежных справах Валер Кавалеўскі і прадстаўнік ў справе абароны і нацыянальнай бяспекі Валерый Сахашчык.
Пазней да Кабінету далучыліся Таццяна Зарэцкая – прадстаўніца ў справе фінансаў і эканомікі ды Аліна Коўшык – прадстаўніца ў пытанні нацыянальнага адраджэння.
Алена Рувіна belsat.eu