Цэнтральны апарат Следчага камітэту Беларусі падвёў вынікі працы следчых за першае паўгоддзе 2023 года, у прыватнасці, па раскрывальнасці злачынстваў так званай экстрэмісцкай накіраванасці.
Па выніках першых 6 месяцаў бягучага года Следчы камітэт Беларусі адзначае зніжэнне агульнага ўзроўню злачыннасці за кошт змяншэння колькасці асабліва цяжкіх злачынстваў.
Асобна было адзначана паляпшэнне раскрывальнасці злачынстваў экстрэмісцкай накіраванасці – амаль на 50%. У той жа час кіраўнік СК Дзмітрый Гора заявіў, што неабходна ўзмацніць кантроль над расследаваннем экстрэмісцкіх справаў і кіберзлачынстваў.
Таксама старшыня СК распавёў пра стварэнне на юрыдычных факультэтах шэрагу ВНУ мэтавых групаў для «навучання студэнтаў у інтарэсах Следчага камітэту».
Следчыя сфармавалі шэраг задач па рэалізацыі комплексу мераў па далейшым раскрыцці і расследаванні крымінальных справаў «экстрэмісцкай накіраванасці».
Паводле Праваабарончага цэнтру «Вясна», з крымінальным пераследам паводле палітычных матываў у Беларусі пачынаючы з 2020 года сутыкнуліся не меней за 4300 чалавек. З іх мінімум 3645 былі засуджаныя праз «палітычныя» крымінальныя справы.
Адным з самых «пратэсных» артыкулаў Крымінальнага кодэксу стаўся 342-і («Актыўны ўдзел у дзеяннях, што груба парушаюць грамадскі парадак»). Паводле яго засудзілі прынамсі 1440 чалавек, 407 з якіх – жанчыны.
Яшчэ 528 чалавек былі засуджаныя паводле дыфамацыйнага артыкулу 368 КК («Абраза прэзідэнта»).
Марыя Міхалевіч belsat.eu
