«Белсат» працягвае расказваць пра рэпрэсіі беларусаў, якія чыніць рэжым Лукашэнкі. Сабралі факты рэпрэсіяў, пра якія стала вядома 10 ліпеня.
У абласным судзе Горадні 10 ліпеня пачаўся суд над гарадзенскім журналістам і грамадскім дзеячам Паўлам Мажэйкам і адвакаткай Юліяй Юргілевіч. Толькі падчас суда стала вядома, за што іх судзяць. Палітзняволеных абвінавачваюць у перадачы звестак «Белсату» ў лютым – сакавіку 2022 года, што расцанілі як «спрыянне экстрэмісцкай дзейнасці» (ч. 2 арт. 361 КК).
Павел Севярынец знайшоўся ў Гарадзенскай турме. Пра гэта паведаміла жонка палітвязня Вольга Севярынец. Яна адзначыла, што сваякі не ведаюць, як прайшло «этапаванне» Паўла. «Ён жывы, гэта галоўнае», – піша Вольга.Новы адрас для лістоў: 230023, Горадня, турма №1, вул. Кірава, 1, камера 16.
Сілавікі затрымалі магілёўскага журналіста Дзмітрыя Ляпейку. У выніку суда мужчыну арыштавалі на 15 содняў за падабайкі і падпіскі ў сацсетках. Да 2020-га Дзмітрый супрацоўнічаў з выданнем «Магілёўскія ведамасці», потым заняўся фрылансам. Вядома, што журналіст актыўна ўдзельнічаў у дзейнасці Цэнтру гарадскіх ініцыятыў і быў мадэратарам сустрэч.
Спевакі гурта «Litesound», які прадстаўляў Беларусь на Еўрабачанні, і іхныя бацькі – у «спісе экстрэмістаў». МУС дадало ў «Пералік грамадзян Беларусі, замежных грамадзян або асоб без грамадзянства, якія маюць дачыненне да экстрэмісцкай дзейнасці» яшчэ 24 асобы. Сярод іншых у спіс дадалі інжынера «Магілёўскіх гарадскіх электрычных» сетак Уладзіслава Купрыянава, спевакоў Дзмітрыя і Уладзіміра Каракіных, а таксама іхных маці Вольгу Крайко і бацьку Юрыя Каракіна.
Значна павялічылася колькасць затрыманых пасля вяртання ў Беларусь, паведамляе праваабарончы цэнтр «Вясна». Толькі за чэрвень не менш за 36 чалавек былі асуджаныя за «экстрэмісцкія» падпіскі і рэпосты ў васьмі прымежных гарадах і мястэчках па ўсёй Беларусі: Воранава, Астравец, Ашмяны, Браслаў, Лёзна, Гарадок, Дуброўна, Берасце. Акрамя таго, у мінулым месяцы было асуджана не менш за 13 чалавек, затрыманых на беларуска-расейскай мяжы.
З 11 ліпеня беларусы будуць абавязаны паведамляць «кампетэнтным органам» аб наяўнасці іншага грамадзянства або ВНЖ. Начальнік упраўлення па грамадзянстве і міграцыі МУС Аляксей Бягун адзначыў, што гэтая норма закона нібыта не абмяжоўвае правы грамадзян. Паводле ягоных словаў, інфармацыя аб іншым грамадзянстве збіраецца найперш пры назначэнні на дзяржслужбу.
Алена Рувіна belsat.eu