Прэзідэнт Расеі Уладзімір Пуцін 9 кастрычніка правёў сустрэчу з кіраўніком Следчага камітэту РФ Аляксандрам Бастрыкіным наконт выбуху на Крымскім мосце раніцай 8 кастрычніка.
Падчас сустрэчы Уладзімір Пуцін назваў падрыў Крымскага моста – «тэрактам, які накіраваны на разбурэнне крытычна важнай грамадзянскай інфраструктуры РФ», і заявіў, што аўтары, выканаўцы і заказчыкі падрыву Крымскага моста – спецслужбы Украіны.
У сваю чаргу Аляксандр Бастрыкін далажыў, што па факце падрыву моста заведзена крымінальная справа па артыкуле аб тэрарызме. Ён таксама дадаў, што выбух падрыхтавалі «ўкраінскія спецслужбы, якім дапамагалі грамадзяне Расеі з замежных дзяржаў» і што ўжо ўдалося ўстанавіць падазроных. Таксама Бастрыкін паведаміў Пуціну, што грузавік перад выбухам на Крымскім мосце праехаў праз Балгарыю, Грузію, Арменію, Паўночную Асецію і Краснадар.
Пазней, прэс-сакратар Крамля Дзмітрый Пяскоў, адказваючы на пытанне, ці трапляе тэракт на Крымскім мосце пад магчымасці задзейнічання ядзернай дактрыны, заявіў, што гэта «зусім няслушная пастаноўка пытання».
Заўтра, 10 кастрычніка, Уладзімір Пуцін правядзе нараду з членамі Савету бяспекі, паведаміў Дзмітрый Пяскоў.
«На заўтра Саўбез запланаваны. Па тэмах зарыентуем пасля таго, як прэзідэнт выступіць», – сказаў Пяскоў, адказваючы на пытанне, калі пройдзе паседжанне Савету бяспекі і ці будзе закранацца сітуацыя вакол Крымскага моста.
Нагадаем, на Крымскім мосце раніцай 8 кастрычніка адбыўся выбух. Праз выбух былі разбураныя тры пралёты аўтамабільнай часткі моста, а таксама загарэўся цягнік з цыстэрнамі на чыгуначнай частцы. Следчы камітэт Расеі сцвярджае, што ў выніку здарэння загінулі тры чалавекі.
Алена Рувіна belsat.eu
