Мастак Дэ Лёс разам з «Белсатам» сочыць за галоўнымі падзеямі. Гэтым разам у малюнках – беларускі ноўтбук, пазбаўленне грамадзянства, новыя прысуды палітзняволеным.
У Дзень ведаў, 1 верасня, Аляксандр Лукашэнка ладзіць у Палацы Рэспублікі адкрыты ўрок для навучэнцаў пад назваю «Гістарычная памяць – дарога ў будучыню!». Падчас уроку ён прадэманстраваў «камп’ютар нумар адзін», створаны ў Беларусі. Таксама ён заявіў, што «такіх сучасных рэчаў не робіць ніводная краіна». Гэты цуд выраблены на заводзе «Гарызонт».
6 верасня на нарадзе, на якой «абмяркоўваўся» законапраект аб грамадзянстве, Аляксандр Лукашэнка зноў вярнуўся да тэмы беларусаў, якія з’ехалі з краіны пасля пратэстаў 2020 года. Выступоўца прапанаваў на іх «яшчэ раз паглядзець» і вызначыць, ці «вартыя яны таго, каб заставацца грамадзянамі Беларусі».
3 верасня нашая калега, журналістка «Белсату» Дар’я Чульцова выйшла на волю, адбыўшы цалкам пакаранне: 2 гады пазбаўлення волі ў Гомельскай жаночай калоніі. Дар’ю асудзілі разам з журналісткаю Кацярынай Андрэевай за стрым з плошчы Пераменаў у Менску, які яны вялі 15 лістапада 2020 года.
Суддзя Сяргей Хрыпач агучыў прысуд у справе Марфы Рабковай, Андрэя Чапюка і яшчэ васьмі палітвязняў. Агулам на ўсіх – 94 гады пазбаўлення волі. Судовы працэс у «справе «Рэвалюцыйнага дзеяння» пачаўся 25 красавіка ў Менскім гарадскім судзе адразу над дзесяццю палітычнымі зняволенымі. Іх абвінавацілі паводле 10 артыкулаў Крымінальнага кодэксу, у тым ліку ў стварэнні экстрэмісцкага фармавання, арганізацыі масавых закалотаў і ва ўдзеле ў іх.
Часовую павераную ў справах Еўрапейскага Звязу ў Беларусі Эвэліну Шульц схапілі пасля суда над палітвязнямі ў справе «Рэвалюцыйнага дзеяння» 6 верасня і трымалі ў аддзяленні міліцыі каля дзвюх гадзінаў. У Прадстаўніцтве Еўразвязу ў Беларусі назвалі гэта «недапушчальным і абуральным парушэннем дыпламатычнага статусу».