Пылавое воблака з пустыні Сахара зноў рухаецца над Еўропай. Пыл ужо дабраўся да краінаў Балтыі і поўначы Беларусі. Гэта адзначае тэлеграм-канал @nadvorie.
Паводле яго, большая частка пылу пераносіцца ветрам у сярэдніх пластах атмасферы.
«Пра наяўнасць пылу сведчыць памаранчавы колер неба падчас заходу і ранішняга ўзыходу сонца», – гаворыцца ў паведамленні.
Чакаецца, што пыл з Сахары будзе над Беларуссю яшчэ пару дзён.
Паводле звестак Белгідрамету, 9 красавіка забруджанасць паветра вышэй за норму фіксавалася ў Гомлі, Жлобіне І Магілёве.
З прыходам пылу з Сахары ў Еўропу звязаныя таксама нетыповыя для красавіка тэмпературы паветра на кантыненце.
Метэаролагі раяць людзям быць асцярожнымі і прымаць меры для абароны, асабліва тым, хто пакутуе на алергію ці мае праблемы з дыханнем.
Якуб Хруст belsat.eu