Генпракурор завёў крымінальную справу «па факце генацыду насельніцтва Беларусі» ў гады вайны
Генеральная пракуратура распачала крымінальную справу па факце генацыду насельніцтва Беларусі ў гады Вялікай Айчыннай вайны і ў пасляваенны перыяд, заявіў генпракурор Андрэй Швед, перадае БелТА.
«У мэтах сацыяльнай і гістарычнай справядлівасці, ліквідацыі белых плямаў гісторыі, умацавання канстытуцыйнага ладу і нацыянальнай бяспекі мною ўзбуджаная крымінальная справа па факце генацыду насельніцтва Беларусі», – паведаміў Андрэй Швед.
Паводле Шведа, звесткі з крымінальнай справы дазволяць паставіць перад міжнароднымі арганізацыямі пытанне аб прызнанні Беларусі пацярпелай ад генацыду, спыніць спробы абясцэніць гістарычныя факты.
«Вынікі расследавання будуць пакладзеныя ў аснову ідэалагічнай вучэбна-выхаваўчай і інфармацыйнай працы. Каб праз разуменне гісторыі зберагчы пераемнасць паміж пакаленнямі і памяць народу, вывучэнне генацыду беларускага народу варта ўпісаць ува ўсе абавязковыя адукацыйныя праграмы», – адзначыў генпракурор.
Таксама Швед распавёў пра планы звярнуцца з запытам у Нюрнбэрг з просьбай атрымаць доступ да матэрыялаў Нюрнбэргскага працэсу, каб вылучыць тыя звесткі і доказы, звязаныя з Беларуссю.
АД, belsat.eu
