Акцыі пратэсту ў Беларусі працягваюцца 243 дні. Беларусы патрабуюць адстаўкі Лукашэнкі, спынення гвалту і пакарання вінаватых у прававым бязмежжы. У адказ рэжым узмацняе рэпрэсіі. «Белсат» падводзіць вынікі дня.
Святлана Алексіевіч заявіла, што піша кнігу пра падзеі ў Беларусі, якія адбываліся пасля прэзідэнцкіх выбараў
«Многія людзі тэлефануюць мне, дасылаюць свае ўспаміны», кажа пісьменніца.
Таксама Алексіевіч заўважыла, што беларусы жывуць «паміж дзвюма небяспекамі – Лукашэнкам і Расеяй».
«Мы хочам стварыць незалежную квітучую краіну. Але як? Я пісьменніца, не палітык, у маёй кнізе я шукаю адказ на гэтае пытанне», – заявіла Алексіевіч.
Дарадца Святланы Ціханоўскай Франак Вячорка распавёў пра новыя санкцыі
«Сёння пад міжнароднымі санкцыямі 327 саюзнікаў Лукашэнкі, сярод іх прапагандысты, суддзі і найбліжэйшыя «гаманцы».
Краіны Еўразвязу падалі свае прапановы па разглядзе ўвядзення санкцыяў супраць 197 чалавек і некалькіх дзясяткаў кампаній. Санкцыі могуць быць абвешчаныя ўжо праз адзін ці два тыдні».
Генпракуратура Рэспублікі Беларусь завяла крымінальную справу па факце генацыду насельніцтва Беларусі ў гады ВАВ
Паводле генпракурора Андрэя Шведа, звесткі з крымінальнай справы дазволяць паставіць перад міжнароднымі арганізацыямі пытанне аб прызнанні Беларусі пацярпелай ад генацыду, спыніць спробы абясцэніць гістарычныя факты.
Часам бываюць і прасветы ў навінах
Сёння сталі вядомыя лаўрэаты прэміі імя Алеся Ліпая
Кацярына Андрэева, Дар’я Чульцова і Кацярына Барысевіч сталі лаўрэаткамі прэміі «Гонар журналістыкі» імя Алеся Ліпая.
Гэтую прэмію ўручаюць трэці год запар. Раней яе атрымлівалі рэдактарка TUT.BY Марына Золатава ды журналістка «Радыё Свабода» Аляксандра Дынько.
Маладзечанскія міліцыянты сарвалі сустрэчу каманды партыі «Разам» з жыхарамі гораду
Сустрэча мелася адбыцца ўчора – на яе прыйшлі каля 10 маладзечанцаў. Аднак неўзабаве ў памяшканне зайшла міліцыя і запатрабавала разысціся. Затрымліваць нікога не сталі.
Нагадаем: пра стварэнне партыі «Разам» нядаўна заявіў штаб Віктара Бабарыкі.
Але ж беларусы не здаюцца
МГМ, belsat.eu
