Паводле звестак «Белсату», у Беларусі затрымалі журналіста Сяргея Сацука – галоўнага рэдактара выдання «Ежедневник». Сайт выдання не адкрываецца.
З чым звязанае затрыманне, не вядома. Паведамляюць, што Сяргея Сацука затрымаў Следчы камітэт, у яго правялі ператрус.
На тэлефанаванні на нумар Сяргея Сацука не адказваюць, нумар ягонага брата Аляксандра недасяжны. Аляксандр пацвердзіў «Еўрарадыё», што ў Сяргея прайшоў ператрус і што Сяргея забралі ў Следчы камітэт. Аляксандр падазрае, што затрыманне можа быць звязанае з тым, што «Ежедневник» пачаў «праект пра беларускіх тэрарыстаў».
У 2020 годзе Сацука затрымлівалі паводле падазрэння ў «атрыманні хабару» за публікацыі, спрабавалі сфармаваць абвінавачанне ў «махлярстве». Яго вызвалілі, але пакінулі ў статусе падазраванага.
Дзелавая онлайн-газета «Ежедневник» існуе з 2006 года. А Сяргей Сацук, акрамя таго, што ёсць галоўным рэдактарам выдання, вядомы як адзін з нешматлікіх журналістаў, што працуюць у жанры расследавання.
Адзін з найбольш гучных матэрыялаў Сацука выйшаў у жніўні 2018 года і быў прысвечаны пастаўкам незарэгістраванай у Беларусі карэйскай вакцыны «Эўпэнта», ад якой у Ганцавічах памерла двухмесячнае дзіця. Сацук прыйшоў да высновы, што Міністэрства аховы здароўя не мела права набываць «Эўпэнту». Матэрыял Сацука быў апублікаваны ў разгар затрыманняў у межах «справы медыкаў», паводле якой праходзілі некалі дзясяткі асобаў.
АА belsat.eu