Расейскія войскі цалкам абясточылі Запарожскую атамную электрастанцыю. Сістэмы жыццезабеспячэння АЭС сілкуюцца ад дызель-генератараў. Пра гэта са спасылкай на НАЭК «Энергаатам» перадае «Укрінфарм».
Паводле інфармацыі ўкраінскага «Энергаатаму», з-за абстрэлу расейскімі войскамі пашкоджаны і адключаны лініі сувязі Запарожскай АЭС з энергасістэмай.
«Сёння ноччу ў 00:59 з-за чарговага абстрэлу расейскімі войскамі была пашкоджана і адключылася апошняя лінія сувязі з энергасістэмай 750кВ ЗАЭС – Дняпроўская. У выніку адбылося поўнае абясточванне Запарожскай АЭС. У аўтаматычным рэжыме ўключыліся дызель-генератары», – гаворыцца ў паведамленні «Энергаатаму».
У «Энергаатаме» дадаюць, што наяўных запасаў дызельнага паліва для іх працы ў такім рэжыме хопіць на 10 сутак, таму патрабуецца рамонт і аднаўленне працы ліній сувязі ЗАЭС з энергасістэмай.
У кампаніі таксама адзначаюць, што планы ўключэння энергаблокаў ва ўмовах абстрэлаў і пашкоджанні ўсіх ліній нерэальныя.
Раней міністр энергетыкі Украіны Герман Галушчанка заявіў, што экспарт электраэнергіі з Украіны ў Еўропу залежыць ад стабільнай працы Запарожскай атамнай электрастанцыі ва ўкраінскай энергасістэме.
Расейскія войскі захапілі тэрыторыю ЗАЭС у сакавіку. 5 кастрычніка Крэмль абвясціў , што электрастанцыя цяпер нібыта належыць Расіі.
Гендырэктар МАГАТЭ Рафаэль Гросі падчас візіту ў Кіеў у чацвер заявіў , што часова захопленая расеяй ЗАЭС у Энергодары застаецца украінскім прадпрыемствам.
Што такое Запарожская АЭС
Запарожская атамная электрастанцыя размешчана ў стэпавай зоне на беразе Кахоўскага вадасховішча ў Запарожскай вобласці Украіны ў горадзе Энергадар. Гэта самая буйная электрастанцыя ў Еўропе. Уведзена ў эксплуатацыю ў снежні 1984 года.
З аб’яднанай энергасістэмай Украіны ЗАЭС звязана чатырма лініямі электраперадач 750 кВ і адной 330 кВ.
Штогод станцыя генеруе каля 40 млрд квт·г электраэнергіі, што складае пятую частку гадавой вытворчасці электраэнергіі на Украіне і палову яе вытворчасці на ўкраінскіх атамных станцыях.
Антон Тачняк belsat.eu
