Латвійскія памежнікі за 7 верасня перадухілілі спробы 173 мігрантаў парушыць дзяржаўную мяжу з боку Беларусі. За апошнія дні іх колькасць павялічылася ў некалькі разоў. Пры гэтым на польскай і літоўскай межах іх колькасць зніжаецца.
У той жа час польскія памежнікі паведамілі пра 59 мігрантаў, якія спрабавалі незаконна перасекчы мяжу, а літоўская служба і зусім не паведамляла пра парушэнні.
У аўторак, 6 верасня, беларуска-латвійскую мяжу спрабавалі парушыць 146 чалавек. З канца жніўня колькасць спробаў незаконнага перасячэння мяжы стала перавышаць 100, але ў 20-х лічбах месяца іх колькасці складала некалькі дзясяткаў. Усяго з пачатку 2023 года было спынена 7384 спробы незаконнага перасячэння мяжы, а 317 чалавек былі прапушчаны ў Латвію па гуманітарных меркаваннях. Аднак за ўвесь мінулы год было перадухілена 5286 спроб незаконнага перасячэння беларуска-латвійскай мяжы, а 217 чалавек прапусцілі з гуманітарных меркаванняў.
Трэба адзначыць, што цяпер латвійская мяжа найменш абароненая ў параўнанні з іншымі межамі Еўразвязу, якія суседнічаюць з Беларуссю. Гэтак, Польшча пабудавала плот яшчэ ў 2022 годзе, а Літва цяпер працягвае будоўлю. Латвія таксама пачала будаваць плот, але плануе скончыць працы толькі ў 2024 годзе.
Сёлета ў траўні начальнік Дзяржаўнай памежнай аховы Латвіі Гунтыс Пуятс (Guntis Pujāts) распавядаў пра выпадкі, калі ўлады Беларусі прапаноўвалі агнястрэльную зброю нерэгулярным мігрантам, якія збіраліся перайсці беларуска-латышскую мяжу. Аднак мігранты адмаўляліся браць зброю, таму пакуль ніякіх інцыдэнтаў з ужываннем зброі супраць латышскіх памежнікаў не было зафіксавана.
Некалькі дзён таму ў Менскім раёне затрымалі групу з 100 мігрантаў з Індыі, якія нелегальна былі ў Беларусі і таксама планавалі трапіць у Латвію. Іх затрымалі беларускія сілавікі.
Алена Рувіна belsat.eu
