«Сур'ёзнае парушэнне дыпламатычных правілаў». У Еўразвязе асудзілі затрыманне сваёй прадстаўніцы ў Менску
Вонкавапалітычнае ведамства Еўрапейскага Звязу 8 верасня выказала рашучы дыпламатычны пратэст у сувязі з затрыманнем у Менску часовай паверанай у справах ЕЗ Эвэліны Шульц. Гэта, заявілі ў ведамстве, ужо другі такі інцыдэнт.
«Незаконнае затрыманне нашага дыпламата зʼяўляецца сурʼёзным парушэннем міжнародных дыпламатычных правілаў», – сказаў прадстаўнік ЕЗ Пэтэр Стана, піша AP News.
Паводле яго, для тлумачэння інцыдэнту выклікалі дыпламатычнага прадстаўніка Беларусі ў Бруселі.
Тым часам Эвэліна Шульц распавяла падрабязнасці свайго затрымання. Дыпламатка адзначыла, што яе затрымалі на выхадзе з Менскага гарадскога суда 6 верасня каля 15:35. Да таго яна размаўляла ў фае будынку з людзьмі, якія прыйшлі на адкрыты прысуд у «справе анархістаў».
Шульц паказвала сілавікам свой дыпламатычны пашпарт і дыпламатычную картку і давала ім зразумець, што мае дыпламатычную недатыкальнасць.
Незадоўга да таго, як Эвэліну Шульц адпусцілі з РАУСу, у пастарунак прыехаў прадстаўнік МЗС, праз яго супрацоўнік міліцыі папрасіў еўрапейскую дыпламатку «прыняць афіцыйны пратакол і падпісаць яго». Шульц падчас гэтай размовы працягвала нагадваць пра свой дыпламатычны імунітэт і патрабавала запрасіць прадстаўніка дэлегацыі ЕЗ або консулаў Польшчы ці Нямеччыны. Таксама Эвэліну Шульц здымалі на камеру, калі зачытвалі пратакол.
Прадстаўніцтва Еўразвязу ўжо звярнулася да ўладаў Беларусі з просьбай развязаць праблему «наўмыснага і сістэматычнага пераследу менскай дыпламатычнай супольнасці» з боку некаторых «сумна вядомых прадстаўнікоў» дзяржаўных медыяў.
Якуб Хруст belsat.eu
