Новым кіраўніком Аб’яднанага Каралеўства Вялікай Брытаніі і Паўночнай Ірландыі, а таксама яшчэ 14 краінаў брытанскай садружнасці будзе старэйшы сын памерлай Элізабэт ІІ – былы прынц Валійскі Чарлз ІІІ. Пра гэта паведаміла новая прэм’ер-міністарка Вялікай Брытаніі Ліз Трас.
Чарлз Філіп Артур Джордж нарадзіўся ў 1948 годзе – за чатыры гады да таго, як ягоная маці стала брытанскай каралевай. Зараз яму 73 гады, і ў якасці спадчынніка брытанскага трону ён знаходзіцца больш за ўсё ў гісторыі.
Чарлз з’яўляецца сынам грэцкага прынца Філіпа, які памёр у 2021 годзе і паходзіў з дацкай каралеўскай дынастыі Глюкзбургаў, прадстаўнікі якой сёння кіруюць таксама ў Нарвегіі.
Спадчыннікам караля Чарлза ІІІ цяпер будзе ягоны старэйшы сын Ўільям. Мінулыя каралі з імем Чарлз кіравалі Англіяй у XVII стагоддзі.
Якуб Хруст belsat.eu
