«Белсат» падводзіць вынікі апошніх содняў поўнамаштабнай вайны, распачатай Расеяй ва Украіне. Пра галоўныя падзеі станам на вечар 8 ліпеня чытайце ў нашым аглядзе.
Паводле звестак Генеральнага штабу ЗСУ, з моманту поўнамаштабнага ўварвання ва Украіну страты расейскага войска дасягнулі 36 900 чалавек забітымі.
Пры гэтым расейская служба BBC змагла ўсталяваць імёны больш за 4500 расейцаў, якія загінулі ў вайне ва Украіне. Паводле крыніцы, каля 17 % з іх былі афіцэрамі. Адзначаецца, што цяпер найчасцей фіксуюцца смерці добраахвотнікаў.
Цягам апошніх содняў ва Усходняй зоне аперацыі расейцы не спынялі наступальных дзеянняў з мэтай займець поўны кантроль над тэрыторыяй Данбасу.
На славянскім кірунку расейцы абстрэльвалі паселішчы на падкантрольнай Украіне тэрыторыі, таксама намагаліся некалькі разоў штурмаваць Багародзічнае, але зазналі страты і былі вымушаныя адступіць на старыя пазіцыі.
На бахмуцкім кірунку расейцы таксама працягнулі абстрэлы ўкраінскіх тэрыторыяў. Пры гэтым яны намагаліся наступаць у бок паселішчаў Спірнае і Івана-Дар’евка, але ў выніку панеслі страты і адступілі. Цяпер баявыя дзеянні працягваюцца ў ваколіцах Вясёлай Даліны.
На краматорскім кірунку вораг таксама не абмежаваўся абстрэламі і здзейсніў штурм у бок Верхнякаменкі, дзе меў частковы поспех. Пры гэтым амерыканскі Інстытут вывучэння вайны мяркуе, што расейскія войскі рыхтуюцца да адначасовага наступу на Славянск і Краматорск.
На аўдзееўскім, курахаўскім і навапаўлаўскім кірунках працягваюцца перастрэлкі з розных відаў зброі па ўсёй лініі сутыкнення.
Адзначаецца, што за межамі Усходняй зоны аперацыі войскі РФ пераважна трымалі абарону.
На харкаўскім кірунку яны намагаліся не дапусціць прарыву ЗСУ, а таксама абстрэльвалі ваколіцы Харкава, Мыкільскага, Лэбяжага, Уды, Дэмэнціеўкі, Верхняга і Старога Салтава, Пятроўкі, Рускіх Тышак і Байраку з артылерыі, рэактыўных сістэмаў залпавага агню і танкаў. Спроба штурму ў напрамку Дэмэнціеўкі была спыненая ўкраінскімі сіламі.
На паўднёвабужскім кірунку расейцы намагаліся не дапусціць прарыву ўкраінскіх сілаў, пры гэтым праводзілі абстрэлы з розных відаў узбраення. Таксама яны спрабавалі весці наступаць у бок Вялікага Артакава, але ЗСУ хутка адбілі гэтую атаку.
На сівэрскім кірунку вораг абстраляў ваколіцы населенага пункту Міхальчына-Слабада.
На валынскім і палескім кірунках, якія выходзяць на межы з Беларуссю, цягам апошніх содняў сітуацыя не мянялася. Пры гэтым падраздзяленні Узброеных сілаў Беларусі займаюцца выведкай, адзначаецца актыўнае выкарыстанне для гэтага беспілотнікаў.
BK belsat.eu