На месца Шэймана прызначылі зоаінжынера, які кіраваў калгасамі і неканкурэнтаздольным Белкаапсаюзам
Аляксандр Лукашэнка прызначыў 8 ліпеня новага кіраўніка Упраўлення справамі прэзідэнта. Да нядаўняга часу гэтую пасаду займаў Віктар Шэйман.
Як паведамілі ў прэс-службе Лукашэнкі, новым кіраўніком ведамства прызначаны Валерый Іваноў, які да цяперашняга часу ўзначальваў Белкаапсаюз.
Валерый Іваноў нарадзіўся 27 ліпеня 1955 года ў Клімавіцкім раёне Магілёўскай вобласці. Скончыў Беларускую сельскагаспадарчую акадэмію па спецыяльнасці зоаінжынер, Інстытут паліталогіі і сацыяльнага кіравання БДУ па спецыяльнасці палітолаг і Акадэмію кіравання пры прэзідэнце па спецыяльнасці «Кіраванне прадпрыемствамі аграпрамысловага комплексу».
Валерый Іваноў працаваў галоўным заатэхнікам Круглянскага раёну. Больш за 20 гадоў узначальваў розныя калгасы Кіраўскага раёну. Затым з 1987 па 1997 годзе быў першым намеснікам старшыні Круглянскага райвыканкаму.
З 2002-га па 2004 год – старшыня Кіраўскага райвыканкаму, з 2004-га па 2008-ы – Шклоўскага. Двойчы абіраўся чальцом Савету Рэспублікі Нацыянальнага сходу і адзін раз дэпутатам Палаты прадстаўнікоў. У 2008-2010 гадах – намеснік старшыні Палаты прадстаўнікоў.
У 2010 годзе – першы намеснік Старшыні Менскага аблвыканкаму, затым два гады – віцэ-прэм’ер. Пасля кароткі час узначальваў Беларускую калійную кампанію і быў намеснікам кіраўніка Адміністрацыі прэзідэнта.
Са снежня 2013 года з’яўляўся старшынёй праўлення Белкаапсаюзу. Пры ім Лукашэнка неаднаразова выказваў незадаволенасць працай прадпрыемства, заяўляючы пра яго неканкурэнтаздольнасць.
Нагадаем, што 11 чэрвеня стала вядома пра адстаўку былога кіраўніка Упраўлення справамі прэзідэнта Віктара Шэйман, які спачатку 2000-х знаходзіўся пад заходнімі санкцыямі за меркаваную датычнасць да забойства апанентаў Лукашэнкі.
«Ты шмат разоў пісаў рапарт аб сыходзе ў адстаўку. Я не згаджаўся з гэтым. Але я разумею, што некалі час прыходзіць, табе хапіла ў жыцці. Я сумленна ўдзячны табе за ўсё, што зроблена», – сказаў Лукашэнка на сустрэчы.
МГ belsat.eu
