Мінінфарм заблакаваў сайт «Нашай Нівы». У выданне і да супрацоўнікаў прыйшлі сілавікі
Тэлеграм-канал Антона Матолькі, які ў Беларусі прызнаны экстрэмісцкім, паведамляе, што супрацоўнікі ГУБАЗіК прыйшлі ў будынак «Ветразь» у Менску.
У будынку знаходзіцца рэдакцыя «Нашай Нівы». Сайт выдання цяпер не адкрываецца.
Паводле непацверджанай інфармацыі, бачылі галоўрэда Ягора Марціновіча, якога вялі людзі ў масках.
«Мы не можам звязацца з некаторымі супрацоўнікамі рэдакцыі, у тым ліку галоўным рэдактарам Ягорам Марціновічам. Мы дапускаем, што ў гэты момант ён можа быць затрыманы, паколькі чытачы паведамляюць, што ў будынку, дзе ён знаходзіўся, бачылі супрацоўнікаў ГУБАЗіКа», – піша тэлеграм-канал «Нашай Нівы».
TUT.by паведамляе, што ў некаторых супрацоўнікаў «Нашай Нівы» ўдома праходзяць ператрусы. У прыватнасці, ператрус адбываецца ў рэдактара НН Андрэя Скурко. Няма сувязі з шэф-рэдактарам выдання Андрэем Дынько, рэпарцёркай Наталляй Лубнеўскай, фатографкай Шурай Піліповіч-Сушчыц.
Сілавікі вынялі дакументы з бухгалтэрыі «Нашай нівы». Ператрус там скончаны. Аднак ён пройдзе дома ў галоўнага бухгалтара выдання Вольгі Раковіч.
У Мінінфармацыі заявілі, што «на падставе апавяшчэння Генеральнай пракуратуры ў сувязі з размяшчэннем інфармацыі, распаўсюджванне якой забароненае пунктам 1 артыкула 38 Закона Рэспублікі Беларусь «Аб сродках масавай інфармацыі», Міністэрствам інфармацыі прынята рашэнне аб абмежаванні доступу да інтэрнэт-рэсурсу nn.by».
Хто яшчэ?
Таксама перастаў адкрывацца сайт dev.by. У Беларусі заблакаваны сайт-люстэрка «Еўрарадыё» euroradio.pl.
Апроч таго, сілавікі прыйшлі ў рэдакцыю незалежнай «Брестской газеты» і баранавіцкага недзяржаўнага выдання «Intex-Press».
МГ belsat.eu
