У ноч з 7 на 8 сакавіка паліцыянты ў Тбілісі адціснулі ад будынку парламенту і навакольных вуліцаў большую частку ўдзельнікаў акцыі пратэсту супраць закону аб замежных агентах. Дэманстрантаў, якія заставаліся ля паліцэйскага кардону, заклікалі пайсці адтуль пад пагрозай выкарыстання гвалту, піша «Кавказский узел».
Пратэсты ўспыхнулі пасля таго, як дэпутаты парламенту Грузіі большасцю галасоў ухвалілі ў першым чытанні законапраект аб замежных агентах. Позна ўвечары супрацьстаянне ля парламенту абвастрылася: дэманстранты скарысталі кактэйлі Молатава, а сілавікі – гумовыя кулі, пачаліся затрыманні. Паліцыя адціснула пратэстоўцаў з праспекту Руставэлі ля парламенту.
У выніку выкарыстання слезацечнага газу і вадамётаў ля парламенту Грузіі пацярпелі журналісты і пратэстоўцы. МУС Грузіі заявіла, што ў сутыкненнях з пратэстоўцамі пацярпелі некалькі сілавікоў.
Колькасць затрыманых дэманстрантаў пакуль невядомая. Сярод затрыманых, апроч студэнтаў, ёсць прадстаўнікі грамадзянскай супольнасці, а таксама лідары і актывісты апазіцыйных партыяў.
Частка дэманстрантаў адмовілася адыходзіць ад ачаплення на праспекце Руставэлі ў Тбілісі да раніцы. Як заявіў дэпутат Георгій Вашадзэ, акцыі пратэсту супраць закону аб замежных агентах працягнуцца 8 сакавіка. Яе ўдзельнікі маюць намер дамагацца заканчэння кіравання партыі «Грузінская мара».
Прэзідэнтка Грузіі Саламэ Зурабішвілі, якая цяпер у Нью-Ёрку з афіцыйным візітам, падтрымала ў сваім звароце пратэстоўцаў і сказала, што яны прадстаўляюць свабодную Грузію, піша «Грузия online». Яна таксама паабяцала накласці вета на закон пра замежных агентаў.
«Гэты закон нікому не быў патрэбны, ён узяты не інакш як з дыктату Масквы. Гэта трэба адмяніць. Ні ў якой форме яго не трэба дасылаць у Венецыянскую камісію. Там цудоўна ведаюць, што гэта за закон. Я з першага дня казала, што будзе вета. І вета будзе», – сказала прэзідэнтка.
Паводле яе, «тыя, хто падтрымлівае гэты закон, і тыя, хто галасаваў за гэты закон, парушаюць Канстытуцыю» і адцягваюць Грузію з Еўропы.
Якуб Хруст belsat.eu