Абраная прэзідэнтка Беларусі апублікавала пост у Х, у якім асуджае атаку ХАМАС і выказвае падтрымку народу Ізраілю.
«Мы рашуча асуджаем атакі ХАМАС на Ізраіль, якія прывялі да шырокамаштабных разбурэнняў і трагічнай гібелі невінаватых людзей. Трываласць і моц ізраільскага народу прабіваюцца скрозь нягоды. Мы выказваем шчырыя спачуванні сем’ям загінулых», – напісала Святлана Ціханоўская.
Раніцай 7 кастрычніка ісламісцкі рух сектару Газа ХАМАС здзейсніў маштабны напад на Ізраіль. Былі выпушчаныя тысячы ракет, баевікі прарвалі наземную мяжу. Па стане на 18-ю гадзіну па ізраільскім часе вядома пра як мінімум 100 загінулых і больш чым 900 параненых.
Падтрымку Ізраілю выказалі таксама Францыя, Вялікая Брытанія. Кіраўнік знешнепалітычнага ведамства ЕЗ Жузэп Барэль, Саудаўская Аравія, Турцыя і МЗС Беларусі заклікалі да спынення канфлікту.
Катар, Сірыя і Іран падтрымалі ХАМАС. СМІ паведамляюць, што Ліванская «Хезбала» гатовая ўступіць у вайну, калі Ізраіль пачне наземную аперацыю ў Сектары Газа.
Міністр абароны ЗША заявіў, што Пентагон забяспечыць Ізраіль усім неабходным для самаабароны.
Марыя Міхалевіч belsat.eu
