Адзіным рэгіёнам Украіны, што не абстрэльваўся расейскімі войскамі, стала Чарнавіцкая вобласць на паўднёвым захадзе Украіны. Пра гэта ў эфіры тэлемарафону паведаміў намеснік міністра ўнутраных справаў Украіны Яўгеній Енін.
«Калі казаць пра тыя вобласці, што цярпяць ад расейскіх снарадаў найбольш, дык гэта: Данецкая, якую абстралялі больш за тры тысячы разоў; Луганская – чатыры тысячы разоў; Мікалаеўская была абстраляная 700 разоў. Застаецца адна-адзіная вобласць, у якую, дзякуй Богу, пакуль не «прылятала», гэта Чарнавіцкая вобласць», – сказаў Яўгеній Енін.
Аднак паветраная трывога ў гэтым рэгіёне гучыць перыядычна.
Чарнавіцкая вобласць – самая маленькая вобласць Украіны. Яна мяжуе з Івана-Франкоўскай, Вінніцкай, Хмяльніцкай і Тэрнопальскай вобласцямі. Таксама вобласць мяжуе з дзвюма краінамі – Малдовай і Румыніяй.
Алена Рувіна belsat.eu