Следчы камітэт РФ пачаў крымінальную справу пра халатнасць пасля тэракту ў «Crocus City Hall». Пра гэта ТАСС паведамілі ў праваахоўных органах.
Як заяўляецца, крымінальная справа паводле арт. 293 КК РФ («Халатнасць») распачата ў дачыненні да адказнага за пажарную бяспеку «Crocus City Hall», а таксама начальніка пажарнай каманды цэнтру. Справа звязаная з магчымымі парушэннямі патрабаванняў пажарнай бяспекі, якія маглі пагоршыць сітуацыю пасля падпалу канцэртнай залі тэрарыстамі.
Абодва працаўнікі цяпер знаходзяцца пад падпіскай аб нявыездзе.
Раней відавочцы сцвярджалі, што ў канцэртнай зале пасля яго падпалу нападнікамі не спрацавалі сістэмы аўтаматычнага пажаратушэння, дымавыдалення, не ўключылася аварыйнае асвятленне. А ў праваахоўных органах заяўлялі, што матэрыялы, якімі былі аздобленыя сцены глядзельнай залы «Crocus City Hall», маглі спрыяць імкліваму развіццю ўзгарання.
Вечарам 22 сакавіка перад канцэртам гурту «Пікнік» у маскоўскай канцэртнай залі «Крокус Сіці Хол» адбылася масавая страляніна, гучалі выбухі, адбыўся пажар. Ахвярамі тэракту сталі 145 асобаў, у тым ліку грамадзяне Беларусі.
І хоць адказнасць за напад на сябе бралі прадстаўнікі «Ісламскай дзяржавы», улады Расеі працягваюць настойваць на ўкраінскім следзе.
Якуб Хруст belsat.eu