Наведваючы 7 студзеня Свята-Елісавецінскі манастыр, Аляксандр Лукашэнка падтрымаў ініцыятыву праваслаўных святароў – збор сродкаў для расейскай арміі, што вядзе захопніцкую вайну супраць Украіны.
Раней медыі паведамлялі, што ў Свята-Елісавецінскім манастыры збіраюць дапамогу расейскім вайскоўцам, якія ўдзельнічаюць у вайне супраць Украіны. З дабраславення духоўніка манастыра протаіерэя Андрэя Лемяшонка была створаная валанцёрская група «Дапамога братам».
Пратаірэй Андрэй Лемяшонак і мітрапаліт Веніямін 7 студзеня сустракалі ў Свята-Елісавецінскім манастыры Аляксандра Лукашэнку.
Падчас сваёй прамовы Лукашэнка адзначыў, што нядаўна Свята-Елісавецінскі манастыр збіраў дапамогу для расейскіх жаўнераў на фронце, за што зазнаў крытыку «праплачаных збеглых».
«Вы робіце правільна. Не звяртайце ўвагі на дзясятак-другі праплачаных людзей. Мы не толькі дапамагаем нашым расейскім братам, расейцам, я гэта ніколі не хаваў. І ўчорашні мой візіт да вайскоўцаў, да расейскіх вайскоўцаў, не хаваючы кажу аб тым, што мы падтрымлівалі і падтрымліваем нашых братоў.
Але мы не забываем і пра ўкраінцаў. Каля 10 тысяч, якія ўцяклі ад вайны, летась знайшлі пастаяннае месца жыхарства і прытулак у нашай краіне», – заявіў Лукашэнка.
Лукашэнка таксама падзякаваў праваслаўнаму духавенству за вялікую духоўную і выхаваўчую працу, асабліва важную пасля 2020 года. «Нашыя святары, робячы вялікую працу, выхоўваюць сапраўдных патрыётаў сваёй Айчыны», – падкрэсліў ён.
Глеб Нержын belsat.eu