Улады Літвы плануюць за два гады павялічыць на 450 чалавек колькасць памежнікаў, якія нясуць ахову на мяжы з Беларуссю. Пра гэта паведаміў кіраўнік Службы аховы дзяржаўнай мяжы Літвы Рустамас Любаевас, перадае BNS.
«Згодна з штатным планам, на працягу двух гадоў мы дадаткова падрыхтуем для Службы аховы дзяржаўнай мяжы пры МУС Літвы 450 працаўнікоў», – заявіў Рустамас Любаевас.
Для рыхтавання дадатковых сілаў прадугледжаныя два гады, «бо адразу навучыць такую колькасць складана». Любаевас адзначыў, што з улікам геапалітычнай сітуацыі роля памежнай аховы стала расце:
«Неабходна ўмацоўваць ахову мяжы».
Тым часам літоўскія памежнікі, у адрозненне ад латышскіх і польскіх калегаў, перасталі фіксаваць спробы нелегальнага пераходу мяжы. Як піша 15min.lt, такіх спробаў не было ўжо шэсць содняў. Тым часам 5 лістапада на мяжы Латвіі і Беларусі зафіксавалі 21 спробу нелегальнага пераходу, а 4 лістапада польскія памежнікі не прапусцілі ў краіну 61 мігранта.
Агулам з пачатку 2023 года літоўскія памежнікі выявілі 2191 нерэгулярнага мігранта з тэрыторыі Беларусі. З 3 жніўня 2021-га яны не ўпусцілі ў Літву каля 21,5 тысячы з іх.
3 лістапада на польска-беларускай мяжы салдат Войска польскага падстрэліў мігранта. Паводле папярэдніх звестак, інцыдэнт адбыўся ў выніку няшчаснага выпадку. Следствам займаецца Вайсковая пракуратура Польшчы.
Якуб Хруст belsat.eu
